Perëndimi vazhdon të kërkojë mjete për t’i dhënë fund luftës midis Rusisë dhe Ukrainës. Lëvizjen e fundit në këtë drejtim e ka bërë Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell. Ai i ka kërkuar Afrikës së Jugut që të përfitojë nga “marrëdhëniet e saj të mira” me Moskën për të “bindur” Rusinë që të “ndalojë” konfliktin.
Kjo gjë u kërkua të premten, në një konferencë të përbashkët në Pretoria me ministren e Marrëdhënieve dhe Bashkëpunimit Ndërkombëtar të Afrikës së Jugut, Naledi Pandor.
“Ne jemi të vetëdijshëm për politikën e mosangazhimit të Afrikës së Jugut. Pikërisht për këtë arsye, BE nuk po i kërkon Afrikës së Jugut të zgjedhë anë, ne thjesht po ju kërkojmë të mbroni Kartën e Kombeve të Bashkuara. Asgjë më shumë, asgjë më pak”, tha Borrell, i cili shpreson se “Afrika e Jugut mund të përdorë marrëdhëniet e saj të mira me Rusinë për ta bindur atë të ndalojë këtë luftë”.
Një gjest që ai e cilësoi si një “kontribut të rëndësishëm” për paqen botërore. Në këtë kuptim, ai ka siguruar se ky konflikt “nuk është vetëm një luftë evropiane”. Edhe pse është e vërtetë se “po ndodh në tokën evropiane, lufta prek të gjithë botën”, theksoi ai.
Nga ana e saj, ministrja e Afrikës së Jugut nënvizoi se ky mision i propozuar nga Borrell nuk është përgjegjësi vetëm e Afrikës së Jugut. Më pas, ministrja ka sqaruar se me deklaratat e saj nuk dëshiron të thotë “se vendet e tjera nuk po punojnë sa duhet”, por ajo ka këmbëngulur se “të gjitha vendet duhet të punojnë së bashku për të gjetur një mënyrë për të sjellë fundin e luftës dhe një proces paqeje”.
Në kuadrin e “marrëdhënieve të saj të mira” me Rusinë, Afrika e Jugut po përgatitet të bashkëpunojë me Moskën dhe Pekinin në kryerjen e një stërvitjeje detare. Kjo stërvitje do të zhvillohet shkurtin e ardhshëm. Ndonëse Brukseli “respekton vendimin e qeverisë së Afrikës së Jugut, do të preferoja që të mos e kryenin këtë stërvitje”, është shprehur përfaqësuesi i lartë i BE-së për Politikë të Jashtme dhe Siguri.
