“Pashë 15 veta mbi kokën e tij”, kunati tregon momentet e fundit të Gerti Bogdanit

Padyshim ky është rrëfimi më i vështirë i Arbër Çepanit, teksa ulur në studion e Top Story përballë Grida Dumës ka folur për ikjen nga jeta në mënyrë të beftë të kunatit dhe mikut të tij, Gerti Bogdanit.

Teksa fliste, lotët nuk thaheshin nga sytë e tij, e shpesh shpërthente në të qara me ngashërim, por thekson se donte motra e tij, bashkëshortja e Gertit, që të ishte në studio e të fliste për të!

Ai tregoi momentin se si e mori vesh lajmin që tronditi familjen.

“Sapo ndodhi ma thanë direkt, kaluan disa minuta pasi e gjetën në atë gjendje në tualet dhe e dërguan në spital. Hajde se nuk është mirë Gerti më thanë, nuk është ndjerë mirë dhe është në gjendje të fikti. Nuk e besoja kurrë që mund të kishte diçka të keqe, ishte më i forti ndër ne. Dukej sikur do na përcillte Gerti një nga një, se mendonim se do bënte këtë parakalim. Kur shkova në urgjencë mendova se ka ndonjë gjendje të fikti. Pashë skenën pastaj dhe ishin mbi kokën e Gertit mbi 15 veta që kërkonin ta mbanin dëshpërimisht në jetë, fillova të kuptoja se ishte gjëja serioze”, tha ai.

Pak çaste para se të varrosej ditën e djeshme, bashkëshortja e Bogdanit krah vëllait të saj, u ndal para arkëmortit dhe e përlotur nisi t’i dedikonte disa fjalë të ndjerit.

Çepani u shpreh se do të donte që Bogdani të vazhdonte rrugëtimin pasi i kishte premtuar se nuk do ja lëshonte kurrë dorën.

“Do doja shumë ta kishe vazhduar rrugëtimin o zemër, se më premtove që do e mbanim dorën bashkë, që nuk do ma lëshoje dorën. Por ne do ta vazhdojmë rrugëtimin bashkë, se unë do të të dua çdo ditë për tërë jetën. Zoti të më merrte mua, që t’i rrisje t’i fëmijët”, tha Edlira Çepani e mbytur në lot.

Ish-deputeti i ndjerë Gerti Bogdani u përcoll ditën e djeshme në banesën e fundit. Paraditen e djeshme Kuvendi hapi dyert për ceremoninë e homazheve, ku një rradhë e gjatë njerëzish shkuan dhe i dhanë lamtumirën e fundit ish-deputetit.

Pas përfundimit të ceremonisë së homazheve e cila zgjati prej rreth tre orësh, arkëmorti i Bogdanit iu drejtua varrezave të Sharrës.

j.l./ dita