Pas kërkesës së kreut të Grupit të Partisë Demokratike Gazment Bardhi për të marrë në pyetje drejtorin e Shkollës së Magjistraturës në lidhje me shtimin e fituesve në listë, ka replikuar deputeti socialist Toni Gogu.
Ndërhyrjen e Bardhit, Gogu e ka cilësuar të qëllimtë dhe sipas tij, kërkon të ndryshojë rezultatin.
Ndër të tjera ai akuzoi Rithemelimin duke thënë se “sa zbardh dielli, deri në muzg, përpiqet të jetë e shqetësuar për mbarëvajtjen në punët e drejtësisë. Sa bie muzgu, i marrin magjistratët me libër shtëpie”.
“Kolegu (Gazment Bardhi), mundet të ushtrojë kompetencat e tij të deputetit, të kërkojë informacion pranë institucionit për kuriozitetin apo shqetësimin që ka, ndërkohë që mundet ta ushtrojë të njëjti funksion kur organi i ngarkuar nga Kushtetuta që është përgjegjës për veprimtarinë e Shkollës së Magjistraturës, të vijë të raportojë në Kuvend. Por të ndërhysh në këtë moment, kur konkursi është duke ndodhur, kam përshtypjen që është drejtpërdrejt një ndërhyrje për të ndryshuar rezultatin. Ndërhyrja është e qartë.
Kolegu (Gazment Bardhi) i përket një force politike e cila e kam thënë dhe më përpara sa zbardh dielli, deri në muzg, përpiqet të jetë e shqetësuar për mbarëvajtjen në punët e drejtësisë. Sa bie muzgu, i marrin magjistratët me libër shtëpie.
Ky shqetësim, duket në pamje të parë sikur janë të shqetësuar për mbarëvajtjen e punëve të magjistratëve, nga ana tjetër u qan zemra për 6-mujorshin që ka qenë garancia e tyre për t’i mbrojtur deri më sot. Kur t’ju vijë këtu kryetarja e Këshillit të Lartë Gjyqësor, pyeteni edhe sipas rregullores. Por mos ndërhyni sot nga ballkoni i forcës politike për të ndryshuar rezultatin e Shkollës së Magjistraturës”, tha Gogu.
Gazment Bardhi është shprehur se futja e patronazhistëve në Shkollën e Magjistraturës është ndërhyrje flagrante e politikës në drejtësi.
“Listën e patronazhistëve e keni publike, mjafton të gugëllosh emrat dhe po të deklaroj që një pjesë e tyre, 13 persona janë në listën e patronazhistëve të PS”, theksoi ai.
j.l./ dita
