Pazari amoral i krijimit fiktiv të grupeve parlamentare: Ja çfarë përfitojnë në shifra

Më 11 maj, Kryetari i PD, Sali Berisha, me votat e demokratëve, i dhuroi 4 deputetë Partisë së Lirisë dhe nga 1 deputet secilës nga partitë Partia Republikane (PR), Partia për të Drejtat e Njeriut (PBDNJ), Partia për Demokraci, Integrim e Unitet (PDIU) dhe Partia Agrare Ambientaliste (PAA), duke katandisur PD-në në vetëm 42 deputetë.

Por Berisha nuk ndalet këtu. Ai ka nisur një pazar të ri, për të katandisur grupin parlamentar të PD-së me 35 anëtarë, duke dhuruar deputetë demokratë partive të vogla aleate, që këto të krijojnë grupe të veçanta parlamentare. Sipas deklarimeve publike, Berisha do t’i dhurojë edhe 3 deputetë të tjerë Ilir Metës për të krijuar grupin parlamentar të Partisë së Lirisë, ndërsa 3 të tjerë do t’ua japë 4 partive të vogla për të formuar grupe parlamentare.

Ky pazar amoral, i ngjashëm me marifetin e fshatarëve që regjistrojnë tufa bagëtish fiktive për të përfituar subvencione, ka të njëjtën logjikë: përfitime financiare dhe privilegje administrative, pa ndonjë efekt real për prodhimin apo aksionin politik.

Në rastin e fshatarëve, ata marrin bagëti hua sa për të plotësuar numrin ligjor dhe përfitimet shtesë nga shteti. Në rastin e Berishës, deputetët dhurohen partive të vogla vetëm për të fituar fonde dhe privilegje shtesë brenda parlamentit.

Krijimi i këtyre grupeve partiçka nuk ka lidhje me forcimin e opozitës, por me përfitime konkrete: kryetarët e grupeve marrin 5% shtesë page, 20% më shumë në fondin e dietave, dyfishim të pagesës për telefon dhe karburant, ndërsa grupet parlamentare përfitojnë zyra, fonde shtesë, sekretare, punonjës administrate dhe përfaqësim në delegacione ndërkombëtare.

Kjo skemë nuk është e re. Në vitin 2021, partiçkat e Fatmir Mediut, Vangjel Dules dhe Shpëtim Idrizit morën deputetë hua nga PD-ja dhe krijuan grupet parlamentare kukulla “Për Demokraci e Integrim” dhe “Aleanca për Ndryshim”.

Ashtu si fshatarët që regjistrojnë tufa bagëtish fiktive për të përfituar subvencione, Sali Berisha dhe aleatët e tij po përdorin deputetë demokratë për të përfituar përfitime të pakufizuara në parlament, duke i shndërruar grupet parlamentare në instrument të pasurimit personal, dhe jo në forcim të aksionit opozitar – shkruan faqja online Pamfleti.