Dështon për herë të tretë tentativa e Qeverisë Meloni për të akomoduar emigrantët në kampin e Gjadrit në Lezhë.
Gjyqtarët e Gjykatës së Apelit të Romës kanë vendosur të mos konfirmojnë ndalimet e para të disa prej 43 migrantëve të mbyllur në qendrat e ndërtuara nga Italia në Shqipëri dhe të kthejnë çështjen në Gjykatën e Drejtësisë Evropiane.
43 emigranët që ishin dërguar në qendrat përtej Adriatikut do të kthehen nesër në Itali. Vendimi për të mos konfirmuar ndalimin u mor nga gjyqtarët e Gjykatës së Apelit të Romës, të cilëve iu dha kompetenca për të vendosur me një dekret të qeverisë.
Në aktvendimin e gjykatës theksohet se procesi gjyqësor duhet të pezullohet derisa të vendosë Gjykata e Drejtësisë së BE.
Për shkak të kësaj pezullimi, nuk mund të respektohet afati 48-orësh për konfirmimin e ndalimit, ndaj të ndaluarit duhet të lirohen, siç ka vendosur më parë edhe Gjykata Kushtetuese në raste të ngjashme.
Në qendrën e Gjadrit ndodheshin 43 migrantë, pasi 6 të tjerë ishin transferuar më parë në Itali për shkak se ishin të mitur ose në gjendje të cenueshme. Seancat për konfirmimin e ndalimit nisën mëngjesin e sotëm me pjesëmarrjen e azilkërkuesve përmes videokonferencës dhe me praninë e gjyqtarëve nga Gjykata e Apelit e Romës.
Refuzimet e mëparshme
Në dy rastet e tjera, në tetor dhe në nëntor, gjyqtarët kishin pezulluar ndalimin dhe migrantët ishin kthyer të gjithë në Itali.
Vendimi i parë është më 18 tetor dhe kishte të bënte me 12 kërkues azili nga Bangladeshi dhe Egjipti të dërguar në qendrën e Gjadrit. Gjyqtarët, sipas urdhërave të ngjashme, nuk e kishin konfirmuar ndalimin për “pamundësinë e njohjes si ‘vendet të sigurta’ të shteteve të origjinës së personave të ndaluar, me pasojën që nuk mund të aplikohej procedura kufitare dhe, siç parashikohet në protokoll, transferimi jashtë territorit të Shqipërisë i personave migrantë, të cilët kanë të drejtën të kthehen në Itali”.
Vendimi i dytë është më 11 nëntor
Këtu përfshihen shtatë të huaj, gjithashtu egjiptianë dhe bengalezë. Krahasuar me rastin e parë, qeveria kishte nxjerrë një akt për të përcaktuar listën e re të vendeve të sigurta. Megjithatë, ky akt nuk ka ndryshuar përfundimin e çështjes.
Gjyqtarët kanë pezulluar gjykimin për konfirmimin e ndalimit dhe e kanë lënë gjithçka në duar të Gjykatës së Drejtësisë Evropiane.
Por në thelb nuk ka ndryshuar asgjë: kërkuesit e azilit janë liruar
Në të njëjtën kohë, gjyqtarët kërkuan nga Gjykata e Luksemburgut sqarime mbi përputhshmërinë, e cila është cilësuar si “dyshuese”, e aktit të qeverisë me normat evropiane. Vendimi për këtë çështje pritet më 25 shkurt nga ky organ i BE-së.
d.t/dita
