Ministri i Mbrojtjes, Niko Peleshi ka ofruar gatishmërinë për të shkuar në Pejë, në rast nevoje. Të shtunën, 24 qershor, Peja është përballur me shira të rrëmbyeshëm që shkaktuan përmbytje duke lënë të vdekur dy nënën dhe djalin e saj vetëm 5 vjeç, ndërsa dëmet në infrastrukturë janë të mëdha.
Ministri i Mbrojtjes përmes një postimi në facebook shkruan se i ka telefonuar kryetarit të komunës së Pejës, Gazmend Muxhaherit për ti ofruar gatishmërinë në çdo kohë ndërsa ka shprehur ngushëllime për jetët e humbura.
“Komunikova me kryetarin e komunës së Pejës Gazmend Muxhaheri, të cilit edhe në emër të Kryeministrit i shpreha ngushëllimet dhe gatishmërinë për mbështetje në çdo kohë që banorët e Pejës dhe Kosovës të kenë nevojë. Pranë vëllezërve tanë në këtë ditë të vështirë!” shkruan Peleshi.
Ekipet e Forcës së Sigurisë së Kosovës po vazhdojnë punën në ndihmë të qytetarëve të Pejës të cilët janë prekur nga vërshimet. Ministri i Mbrojtjes, Armend Mehaj ka theksuar se është ngritur edhe gjendja e gatishmërisë në Rexhimentin e Qëndrueshmërisë së Komandës së Logjistikës, dhe Rexhimentin e Xhenios së GK.
Banorët e lagjes “Asllan Qeshme”, ku humbi jetën nëna dhe fëmija në Pejë janë një ndër lagjet më të dëmtuara. Edhe Misioni i KFOR-it në Kosovë, i ka shprehur ngushëllime familjes Ademaj, dy familjarët e të cilës humbën jetën nga vërshimet në Pejë.
