Ministria e Financave ka reaguar në lidhje me kërkesën për zhbllokimin e pagave të magjistratëve dhe personelit të sistemit të drejtësisë, duke sqaruar se pagat nuk janë bllokuar, por se Këshilli i Lartë Gjyqësor dhe Këshilli i Lartë i Prokurorisë kanë paraqitur listëpagesat e muajit gusht mbi një metodologji të ndryshme nga ajo që është aktualisht në fuqi.
Në një letër drejtuar KLGJ-së dhe KLP-së, Malaj kërkon që listëpagesat dhe urdhërshpenzimet e muajit gusht të paraqiten sërish sipas metodologjisë së përdorur deri në muajin korrik, pasi ndryshimet e reja në pagat e magjistratëve ende nuk janë miratuar nga Kuvendi i Shqipërisë.
Pas letrës së Ministrisë së Financave, është përgjigjur edhe Këshilli i Lartë Gjyqësor, i cili thekson se listëpagesat e muajit gusht 2026 janë hartuar dhe dorëzuar pranë degëve përkatëse të Thesarit në përputhje me legjislacionin në fuqi dhe në zbatim të vendimeve të Gjykatës Kushtetuese.
Pra, sipas KLGJ-së, pagat e administratës gjyqësore dhe të personelit mbështetës nuk preken nga Vendimi nr. 15/2026 i Gjykatës Kushtetuese dhe as nga Vendimi nr. 435, datë 26.08.2026 “Për miratimin e pagës referuese bazë për Magjistratin (Gjyqtar)”.
KLGJ nënvizon më tej se listë-pagesat mujore dhe urdhër-shpenzimet përkatëse përgatiten sipas strukturave organizative të miratuara të njësisë shpenzuese, bazuar në listë-prezencën mujore të hartuar nga strukturat përgjegjëse për burimet njerëzore.
Sipas Shoqatës së Prokurorëve, pasi Kuvendi i Shqipërisë nuk i miratoi ndryshimet ligjore brenda afatit të caktuar të 31 korrikut, nga data 1 gusht 2026 hyri automatikisht në fuqi mekanizmi i parashikuar nga vetë Gjykata Kushtetuese në Vendimin nr. 35/2022. Për këtë arsye, Këshilli i Lartë Gjyqësor (me vendimin nr. 435/2026) dhe Këshilli i Lartë Prokurorial (me vendimin nr. 144/2026) miratuan pagën referuese dhe udhëzuan strukturat përkatëse për nisjen e pagesave. Formula e zbatuar nuk është pjellë e KLGJ apo KLP, por pasojë e drejtpërdrejtë juridike e vendimit kushtetues.
REAGIMI:
PAGAT E MAGJISTRATËVE: NJË ÇËSHTJE THEMELORE E SHTETIT TË SË DREJTËS. Në ditët e fundit është krijuar një situatë e pazakontë lidhur me ekzekutimin e pagave të gjyqtarëve dhe prokurorëve. Për të shmangur keqinformimin dhe keqinterpretimet, Shoqata e Prokurorëve sjell në vëmendjen e opinionit publik disa sqarime mbi çfarë ka vendosur Gjykata Kushtetuese, çfarë kanë vendosur organet e qeverisjes së drejtësisë dhe pse pagesat aktuale nuk po ekzekutohen. Kjo çështje nuk lidhet me një kërkesë të re për privilegje apo rritje page, por me zbatimin e një vendimi të Gjykatës Kushtetuese dhe me detyrimin e institucioneve shtetërore për ta zbatuar atë. Më poshtë, disa fakte dhe sqarime për publikun.
j.l./ dita
