Kreu i Prokurorisë së Posaçme Altin Dumani ka pasur sot një takim me gazetarët e kronikës së zezë. Një prej tyre gazetarja Klodiana Lala ka zbuluar disa nga temat dhe informacionet e marra nga ky komunikim.
E ftuar në rubrikën “Opinion” në News24, Lala u shpreh ndër të tjera si u arrit të zbërthej një grup i strukturuar kriminal, me në krye Laert Haxhiun, i njohur si kundërshtari i Aldo Bares.
“Bëhet fjalë për të një penduar të drejtësisë, Artan Tafani. Është arrestuar nga forcat operacionale, të cilët kishin arritur tek ai me metoda speciale. Është një pajisje përgjuese shumë e veçantë që po përdoret për lokalizimin e personave që janë në kërkim për vepra penale.
Në fillim ishte i dyshuar për një grabitje, por gjatë gjurmimit të tij, u zbulua një servis. Automjetet e përdorura në vrasje ishin çmontuar aty. Në shenjat e gishtave doli dhe Tafani.
Ai u rrëfye për vrasjen e parë që ka kryer, vrasjen e Elton Mermalit, pjesë e bandës së Aldo Bares. Nëna e Elton Mermalit edhe pse e moshuar deklaroi në prokurori se autor i vrasjes së djalit ishte Laert Haxhiu dhe dha detaje.
Ka pasur një reagim të tmerrshëm nga babai i Laert Haxhiut duke insistuar se faktet nuk ishin të vërtete, por koha i dha të drejtë. Tafani e pranoi vrasjen, rezultojnë 6 vrasje të kryera prej tij.
Grupi drejtohej nga Laert Haxhiu, një personazh i jashtëzakonshëm i botës së krimit. Është dënuar me 18 vite burg për një vrasje. Më 2017 tentoi të vriste nipin e Aldo Bares, Xhulio Shkurtin. Ai arriti të shpëtonte, por u vranë tre të tjerë.
Është arrestuar edhe e dashura e tij, (e Laert Haxhiut). Ajo i ka dhënë ndihmë që të fshihej”, u shpreh gazetarja Lala.
