Policia e Vlorës ka goditur një rrjet kriminal të përfshirë në prostitucion dhe shitjen e lëndëve narkotike, duke ekzekutuar 4 masa sigurie. Një prej të arrestuarve është shtetasi A.T., i cili është vënë në pranga për akuzën e “Prodhimit dhe shitjes së narkotikëve”, ndërsa për tre shtetaset e tjera, të përfshira në veprimtarinë e prostitucionit, është caktuar masa “Arrest në shtëpi”.
Shtetasi A.T., 39 vjeç, u siguronte lëndë narkotike, kryesisht kokainë, klientëve të tre vajzave që ushtronin prostitucion.
Policia vijon hetimet për identifikimin e shtetasve të tjerë të përfshirë në këtë rrjet dhe për dokumentimin e plotë të veprimtarisë kriminale. Materialet procedurale iu referuan Prokurorisë së Vlorës për veprime të mëtejshme.
“Sektori për Hetimin e Narkotikëve i DVP Vlorë, në kuadër të një procedimi penal të vitit 2024, të kryer me metoda speciale hetimi, në bashkëpunim me Prokurorinë së Vlorës, ekzekutoi 4 masa sigurie, konkretisht:
-masën e sigurisë “Arrest në burg”, caktuar për veprën penale “Prodhimi dhe shitja e narkotikëve”, për shtetasin A. T., 39 vjeç, i arrestuar më herët në kuadër të operacionit “Tabacchino”, pasi dyshohej si bashkëpunëtor në shitjen e lëndëve narkotike kokainë dhe kanabis, në dy subjekte tregtare në Vlorë;
-masën e sigurisë “Arrest në shtëpi”, për veprat penale “Prostitucioni” dhe “Shfrytëzimi i prostitucionit”, për shtetaset:
B., 40 vjeçe, banuese në Vlorë;
A., 27 vjeçe, banuese në Vlorë;
H., 28 vjeçe, banuese në Vlorë.
Nga hetimet e kryera dhe bazuar në provat e siguruara (përfshirë pamje filmike), dyshohet se shtetasi A. T. u siguronte këtyre 3 shtetaseve dhe klientëve të tyre, lëndë narkotike, kryesisht kokainë. Ndërkohë, shtetaset J. B. dhe O. A., përveçse ushtronin prostitucion, shfrytëzonin edhe shtetasen E. H., për këtë veprimtari të paligjshme”, thuhet në njoftimin e policisë.
