Presidenti i Gjermanisë, Frank-Walter Steinmeier, ka shpërndarë të premten dhomën e ulët të parlamentit, Bundestagun, duke i hapur rrugën zgjedhjeve të parakohshme që do të mbahen më 23 shkurt 2025. Vendimi erdhi si pasojë e rënies së koalicionit trepalësh të udhëhequr nga kancelari Olaf Scholz, pas largimit të Demokratëve të Lirë (FDP), që la qeverinë pa shumicë në Bundestag.
“Stabiliteti politik në kohë të vështira kërkon një qeveri funksionale dhe një shumicë të besueshme në parlament,” deklaroi Steinmeier në Berlin. Ai theksoi se zgjedhjet e parakohshme janë zgjidhja e duhur për të tejkaluar ngërçin politik dhe për të siguruar një drejtim të qartë për vendin.
Në fjalimin e tij, presidenti bëri thirrje për një fushatë zgjedhore të drejtë dhe transparente, duke paralajmëruar për rrezikun e ndikimeve të jashtme. “Ndikimi i huaj, qoftë i fshehtë apo i hapur, përbën një kërcënim për demokracinë,” tha ai, duke përmendur shembuj të ndërhyrjeve të raportuara në zgjedhje të tjera, përfshirë ato në Rumani dhe sulmet në platformën X (ish-Twitter).
Kancelari Olaf Scholz do të drejtojë një qeveri të përkohshme deri në formimin e një kabineti të ri pas zgjedhjeve. Ndërkohë, sondazhet tregojnë një epërsi të konsiderueshme për konservatorët e udhëhequr nga Friedrich Merz, të cilët pritet të sfidojnë Social Demokratët e Scholz-it. Partia e ekstremit të djathtë, Alternativa për Gjermaninë (AfD), është gjithashtu në rritje, duke tejkaluar SPD-në në disa sondazhe, ndërsa të Gjelbërit renditen në vend të katërt.
Pavarësisht se partitë kryesore kanë refuzuar të bashkëpunojnë me AfD, prania e saj në parlament mund të vështirësojë formimin e një koalicioni të qëndrueshëm, duke bërë që negociatat pas zgjedhjeve të jenë të komplikuara.
j.l./ dita
