Qendra e Shërbimeve Arsimore bën me dije se aplikimet për të marrë një kopje të testeve të korrigjuara të provimeve të Maturës Shtetërore 2023 mund të bëhen vetëm përgjatë ditës së sotme.
Sipas afatit të përcaktuar, aplikimi online nëpërmjet portalit qeveritar “e-albania” për të kërkuar tërheqjen e fotokopjeve të korrigjuara të provimeve të maturës janë të hapura deri ne orën 16.00 të ditës së sotme.
Shërbimi elektronik “Aplikim për kopje të testit të maturës/fletëpërgjigjes së maturës” u vjen në ndihmë studentëve, që të dërgojnë online një kërkesë, për të marrë në mënyrë elektronike një kopje të testit të tyre të maturës. Pas dërgimit të aplikimit drejt Qendrës së Shërbimeve Arsimore (QSHA) , ai do të procesohet nga specialisti i QSHA-së dhe në varësi të informacionit, kthimi i përgjigjes dhe i materialeve të kërkuara kryhet me anë të emailiit nëpërmjet dokumenteve të nënshkruara në mënyrë dixhitale.
Për këtë shërbim nuk kërkohet asnjë dokumentacion shoqërues.
Procedura se si duhet të veproni:
– Identifikohuni si qytetar në portalin qeveritar www.e-albania.al
– Zgjidhni shërbimin “Aplikim për kopje të testit të maturës/fletëpërgjigjes së maturës”.
– Klikoni butonin “Përdor”.
– Plotësoni të gjithë të dhënat e nevojshme të kërkuara në formular (shkolla, DAR/ZA, provimin përkatës, adresa).
– Klikoni butonin “Dërgo”.
– QSHA-ja njoftohet në sistemin AMS për kërkesën e ardhur dhe verifikon të dhënat e dërguara nga aplikanti.
– Pas trajtimit të kërkesës, QSHA-ja nxjerr kopjet e provimit të maturës dhe materialin PDF të skanuar ia nis aplikantit te “Hapësira ime”, në seksionin “Dokumentet e mia”.
– Ju do të njoftoheni dhe me email, në kohën që shërbimi ka përfunduar.
p.k\dita
