Propozimi francez në Kuvend, protesta në shumë qytete të Maqedonisë së Veriut

Në Maqedoninë e Veriut vijojnë protestat kundër propozimit francez për zgjidhjen e mosmarrëveshjeve me Bullgarinë.

Të organizuar nga VMRO-DPMNE në opozitë, qytetarë të shumtë dolen sot në rrugë në mbarë vendin.

“Bllokadat do të fillojnë në orën 13:00, do ta bllokojmë gjithë Maqedoninë derisa deputetët tanë trima luftojnë në Kuvend për interesat tona në mbrojtje të gjuhës, popullit dhe shtetit maqedonas”, njoftoi heret ne mengjes një zyrtar i kësaj partie opozitare.

Ndërkohë, ashtu si në ditët e kaluara edhe mbrëmë pati sërish protesta në Shkup. Por manifestimi ishte më i qetë dhe nuk u shënuan raste dhune apo trazira. Sakaq, propozimi francez ka mbërritur në kuvendin e Maqedonisë së Veriut dhe pritet caktimi i një seance për shqyrtimin e tij.

Kryeparlamentari Talat Xhaferi, tha se të hënën do të vendoset lidhur me këtë çështje. Ndërkohë, Departamenti Amerikan i Shtetit reagoi për zhvillimet e fundit duke theksuar se respekton të drejtën e qytetarëve të Maqedonisë së Veriut për të protestuar dhe dënoi skenat e dhunës dhe trazirat.

o.j/dita