Studentët e Mjekësisë kanë protestuar para Kuvendit të Shqipërisë, duke kundërshtuar ashpër miratimin me procedurë të përshpejtuar të projektligjit për parandalimin e largimit të mjekëve, sipas të cilit çdo student që do vijojë studimet në këtë degë, duhet të punojë 5 vite në vend, dhe vetëm më pas do të mund të pajiset me diplomën universitar.
Me thirrje dhe brohorima, studentët e konsiderojnë mbajtjen me detyrim në atdhe një vendim të marrë në kundërshtim me të drejtat themelore të njeriut.
“Poshtë diktatura!”, “Mjekët ftohen, nuk detyrohen”- kanë qenë disa nga thirrjet e studentëve para Kuvendit. Studentët nuk kanë kursyer as kryeministrin Edi Rama, teksa me një ironi të hollë i kujtuan kreut të qeverisë përmes pankartave të tyre studimet në Francë. “Ty s’ta mbajtën diplomën z.Rama, apo nuk iu desh”- shkruhej në mesazhin e studentëve.
Vlen të theksohet se, qeveria ka vendosur për të mbajtur me detyrim për 5 vite studentët e mjekësisë në atdhe pas përfundimit të studimeve. Gjatë protestës së sotme studentët e konsideruan vendimin diskriminues, duke theksuar se prindërit e tyre paguajnë taksa që ata të arsimohen.
Nën thirrjet “turp, turp”, studentët e quajnë “diskriminim” vendimin e Qeverisë Shqiptare dhe kërkojnë që të anulohet menjëherë.
Në të kundërt, studentët paralajmërojnë se vitin e ardhshëm do të bojkotojnë studimet.
p.k\dita
