Ditën e sotme, në Bulevardin “Dëshmorët e Kombit” kanë dalë fadromat, të cilat po heqin gurët nga trotuari.
Ndërhyrja vjen disa ditësh protestash studentore, të shoqëruara me tensione dhe përplasje me forcat e rendit.
Gurët u kthyen në një prej mjeteve kryesore të përdorura nga protestuesit gjatë përplasjeve të ashpra me forcat e policisë, të shoqëruara me akte dhune para Kryeministrisë dhe zona të tjera të kryeqytetit.
Kujtojmë që ata protestojnë prej ditësh duke kërkuar largimin e kryeministrit Edi Rama. Fillimisht e nisën revoltën e tyre para ministrisë së Arsimit, ndërsa më pas u zgjerua nëpër kryeqytet, duke prekur institucione shtetërore dhe biznese të ndryshme.
Paraditen e sotme, me një gur në dorë në zyrën e tij Edi Rama tha se nuk ka ndërmend të japë dorëheqjen edhe pse vendi po kalon në në kaos, në një nga momentet më të vështira që ka pasur ndonjëherë.
Ai tha se nuk do t’i hapë rrugë atyre që nuk e mundën dot në zgjedhje, nuk e kanë mundur dot në argumenta dhe kanë marrë gurët për ta përzënë.
“Janë disa që thonë “hapi rrugën rinisë”. Cilës rini? Kësaj? Kësaj? Le të supozojmë se ia hapa rrugën kësaj, çfarë vjen pas kësaj? Vjen një qeverisje më e mrië? Vjen një Shqipëri europiane? Pas kësaj vjen e kaluara që ia kemi paguar të gjitha haraçet dhe nuk kam ndërmend ta kthej vendin në të kaluarën” u shpreh Rama.
Kryeministri pranoi se është ai pas vendimit për të nxjerrë RENEA-n në terren duke kërcënuar protestuesit se “rrethi për ta do të shtrëngohet”.
“Renea ka detyrë të dalë në momentin kur ka kërcënim. Renea del edhe kur ka ndeshje futbolli Shqipëria me Serbinë, cfarë do të thotë kjo? Doli dhe do të dalë. Do të shtrëngohet rrethi ndaj atyre me maska. E ka edhe ligji që ti nuk mund ta fshehësh identitetin”, e mbylli Rama me këtë kërcënim fjalën e tij.
j.l./ dita
