“15 mijë euro për çdo viktimë”, dy pakistanezë planifikuan sulm terrorist në Greqi me armë nga Shqipëria

Në prangat e policisë greke përfundoi një 27-vjeçar, i cili jetonte në Zakynthos dhe një 29-vjeçar, i  zhvendosur në Spartë.

Media greke thotë se të arrestuarit kishin krijuar një marrëdhënie me të burgosur nga Pakistani, që kishin kontaktuar shtetas shqiptarë në kërkim të armëve që do t’i përdornin për një sulm terrorist.

Ata janë kapur në flagrancë, teksa po transportonin disa nga armët që kishin marrë, drejt banesës së tyre, ku u gjet edhe plani i sulmit.

Së bashku me tre persona të tjerë ata përbënin një celulë që merrte urdhra nga një bashkatdhetar i tyre me banim në Teheran.

Ata po planifikonin të sulmonin sinagogën izraelite në Psirri.

Para se të niseshin për të kryer sulmin, pakistanezët kishin diskutuar me njëri-tjetrin për numrin e personave që do vrisnin. Ata ishin nën presion nga lideri i tyre në Teheran për të vepruar shpejt dhe për të mos humbur kohë. Ata do paguheshin me nga 15 mijë euro për çdo viktimë, prandaj synonin të vrisnin sa më shumë persona që të ishte e mundur.

m.b/dita