Kur vjen puna tek narkotrafiku dhe grupet kriminale, hipotezat nuk mbarojnë kurrë, pasi dosjet dhe hetimet, duke nisur që nga indiciot dhe deri tek provat dhe ndalimet, janë gjithnjë një ‘labirinth’.
Gazetari Artan Hoxha ka folur për kokainën dhe lëndët e tjera narkotike që janë shpërndarë gjatë 2 festivaleve që janë zhvilluar në vendin tonë, në Lezhë dhe në Dhërmi.
Në fjalën e tij gjatë një interviste, Artan Hoxha tha se festivalet ishin marrë “përsipër” për furnizim nga një grup kriminal që kujdesej për shpërndarjen dhe plotësimin e kërkesës. Ai tha për “Euronews”, se ishin nga gati 17 mijë pjesëmarrës në festivale që e kërkonin lëndën narkotike.
“Kemi pasur 2 festa, tek Rana e Hedhur dhe Dhërmi. Unë me shaka kam thënë kush e ka fituar tenderin për të furnizuar? Ke 17 mijë veta që duan lëndë narkotike.
Atje brenda nuk hyn dot askush. Ata që e kishin marrë projektin e kishin marrë edhe me siguri. Në Shqipëri janë markete ku të tregtosh lëndë cilësore narkotike.
Në Dhërmi u kapën nga Kosova, sivjet u kapën anglezë. Ka stok, nuk ka nevojë të përpunohet. Doza ka rënë, ka vajtur në 0.3 po është e pastër.
Organizatat kriminale që fusin kokainën në Shqipëri, që prej gushtit të vitit të kaluar, që kur u zhduk Ervis Martinaj, ata e kanë marrë nën kontroll aksion kryesor të vendit dhe nuk ka problematika“, tha Hoxha.
