Legjislacioni i ardhshëm për kthimin e emigrantëve nga Bashkimi Evropian në vendet e origjinës nuk do të përfshijë të ashtuquajturat “pikat e kthimit” jashtë territorit të BE-së, si ato të ngritura në Shqipëri pas marrëveshjes me Italinë.
Lajmin e ka bërë të ditur një burim në dijeni të draftit, për Euronews. Legjislacioni, që do të prezantohet të martën e ardhshme në Strasburg gjatë sesionit plenar të Parlamentit Evropian, synon të çojë në krijimin e rregullave të harmonizuara në radhët e bllokut mbi procedurat e kthimit të emigrantëve në vendet e tyre, nëse kërkesa e tyre për azil refuzohet.
Pikat e kthimit parashikohej të shërbenin si qendra të ngritura në vende të treta jashtë Unionit, ku aplikantët e refuzuar do të mund të prisnin derisa të realizohej kthimi i tyre në vendin e origjinës.
Sikurse ka raportuar më herët Euronews, Komisioni Evropian po shqyrtonte mundësinë e përfshirjes së këtyre qendrave në ligj.
Shtete të shumta anëtare, përfshirë Austrinë, Bullgarinë, Republikën Çeke, Danimarkën, Gjermaninë, Greqinë, Italinë, Letoninë dhe Maltën e mbështetën si opsion.
Por shumë organizata të shoqërisë civile i kundërshtuan këto qendra, me argumentin se do të çonin në burgime të gjata dhe në shkelje të të drejtave të njeriut.
Ligjet aktuale të BE-së i ndalojnë autoritetet të dërgojnë emigrantët kundër vullnetit të tyre në vende ku ata nuk kanë një lidhje.
Disa shembuj, si ngritja e bazave në Gjadër dhe Shëngjin, u kritikuan ashpër dhe u cilësuan si çnjerëzore dhe joefikase.
Kryeministrja italiane Giorgia Meloni ra dakord me kryeministrin Edi Rama të dërgojë 36 mijë emigrantë të parregullt në Shqipëri, teksa prisnin përgjigjen përfundimtare mbi kërkesën e tyre për azil.
