“Një vend ku ndodhin gjëra të çmendura është shtëpia jonë.”
Ky ishte paralajmërimi që Jude Bellingham u dha lojtarëve të Arsenalit pasi Real Madrid humbi 3-0 ndaj Topçinjve në ndeshjen e parë çerekfinale të Ligës së Kampionëve të martën mbrëma në Emirates.
Ndeshja e kthimit zhvillohet të mërkurën e javës së ardhshme në Santiago Bernabeu.
Madridi nuk ka pësuar kurrë një humbje më të thellë se 3-0 në fazën eliminatore të Ligës së Kampionëve, dhe pas fishkëllimës së fundit, Bellingham tha se skuadra spanjolle nuk ishte aspak afër.
Madridi ka humbur pesë ndeshje të Ligës së Kampionëve këtë sezon dhe nuk ka humbur kurrë më shumë se kaq. Kjo është hera e 12-të që një ekip anglez fiton me tre ose më shumë gola në fazën eliminatore të Champions League. Çdo herë, skuadrat angleze kanë kaluar në raundin tjetër pas fitoreve në ndeshjen e parë.
Pavarësisht kësaj, ylli anglez beson se Real Madridi është ende gjallë në Ligën e Kampionëve. Skuadra madrilene ka shumë rikthime dramatike në kompeticionin elitar të Evropës.
Sezonin e kaluar, Real Madrid ishte vetëm disa minuta larg eliminimit në gjysmëfinale nga Bayern, por shënoi dy gola vonë në Bernabeu. Tre sezone më parë, Madridi shënoi gola vonë kundër Chelsea dhe Manchester City për të qëndruar në Ligën e Kampionëve. Në të dyja rastet, skuadra e Carlo Ancelottit fitoi kompeticionin.
“Ne kemi nevojë për diçka vërtet të veçantë, diçka vërtet të çmendur,” tha Bellingham. “Na kanë mbetur edhe 90 minuta futboll dhe gjithçka mund të ndodhë në Bernabeu”.
Edhe pse i njohur për rikthimet dramatike, Real Madridi nuk është kualifikuar asnjëherë pasi ka humbur ndeshjen e parë me tre gola.
“Ka gjithmonë një herë të parë. Duhet të provojmë. Rikthimi fillon sonte”, tha trajneri Carlo Ancelotti.
“Shanset për kualifikim nuk janë të mëdha, por duhet të përpiqemi dhe të japim maksimumin. Duhet të bëjmë gjithçka mundemi, është një mundësi për t’u përgjigjur pas një ndeshjeje të dobët. Nëse ndeshja e parë merret si bazë, atëherë nuk ka asnjë shans. Por futbolli ndryshon. Në futboll, gjithçka mund të ndodhë. Duhet të besojmë sepse ka ndodhur shumë herë në Bernabeu”, shtoi Ancelotti.
d.t/dita
