Shpesh në institucionet publike shqiptare, drejtuesit e rinj hyjnë me shumë zhurmë, me premtime për reformë, transparencë dhe ringritje. Por në realitet, ky entuziazëm zbehet shpejt përballë sfidave reale të menaxhimit. Rasti i RTSH-së është simptomë e një modeli drejtuesish që duken të zotë në retorikë, por dështojnë në përgjegjësitë më minimale
Radio Televizioni Shqiptar (RTSH) po përballet me një situatë të tensionuar financiare dhe institucionale, ndërsa një numër i konsiderueshëm punonjësish dhe bashkëpunëtorësh kanë nisur procedura ligjore për mospagesa të pagave dhe detyrimeve kontraktuale – sipas raportimeve të fundit në media.
Burime nga brenda institucionit bëjnë me dije se në zyrat e drejtoreshës së përgjithshme, znj. Eni Vasili, mbërrijnë çdo ditë padi nga avokatë që përfaqësojnë individë apo ekipe të ndryshme të punësuar në RTSH.
Bëhet fjalë për gazetarë, drejtues programesh, muzikantë dhe autorë të emisioneve të ndryshme që pretendojnë se nuk janë paguar për muaj me radhë.
Një nga rastet më të përfolura është ai i emisionit “Ditari i një artisti”, ku gazetarja Kozeta Kurti dhe stafi i saj raportohen të kenë kërkuar zyrtarisht pagesat e mbetura pezull. Pasi nuk ka pasur një zgjidhje me drejtuesit aktualë të RTSH-së, mes të cilëve dhe Anduena Manushi, është paralajmëruar ndjekje gjyqësore.
Edhe emisioni “Mes Nesh”, i drejtuar nga Andri Xhaho dhe Iva Shabani, thuhet se është mbyllur një muaj para përfundimit të kontratës. Megjithëse staf i brendshëm, ata nuk janë paguar për muajin e fundit të punës.
Ndërkohë, edhe analisti Mentor Nazarko mësohet se ka ngritur padi ndaj institucionit për detyrime të papaguara.
RTSH, si media publike, financohet pjesërisht nga taksat e qytetarëve dhe ka përgjegjësi të lartë për transparencë dhe menaxhim korrekt të fondeve.
Premtimi fillestar i drejtueses së re për të sjellë reformë dhe stabilitet, për momentin po sfidohet nga realiteti financiar dhe nga pasiguria e krijuar brenda institucionit.
Zyrtarisht, RTSH nuk ka dhënë ende një reagim publik mbi situatën e pagave apo për paditë në fjalë.
M.Aleksi / Dita
“Padish” – shkruhet me “ë” në fund;
Përshëndetje.
Fjala “padish” në këtë rast shkruhet pa “ë” në fund*, pra “padish”*, jo “padishë”.
Forma e saktë është:
“RTSH përballet me valë të re padish.”
– “Padi” është emër i gjinisë femërore dhe shumohet “padi” / “paditë”*.
– Por në këtë fjali, “valë padish” është një ndërtim në rasën gjinore (shquar: “valë e padive”, e pashquar: “valë padish”), dhe “padish” mbetet pa “ë”.
Pra, drejtshkrimi ynë është i saktë.