“Evropa e mbrojtjes më në fund është zgjuar”, tha Presidentja e Komisionit Evropian Ursula von der Leyen , duke folur sot nga Haga në sesionin hapës të Samitit të NATO-s për Forumin e Industrisë së Mbrojtjes.
Von der Leyen e përshkroi objektivin prej 5% të shpenzimeve të mbrojtjes të vendosur nga NATO për aleatët nesër si “historik” , duke nënvizuar rëndësinë e mënyrës se si shpenzohen investimet.
“Arkitektura e sigurisë në të cilën jemi mbështetur për dekada nuk mund të merret më si e mirëqenë”, shtoi ajo duke përshëndetur veprimin e ri që Evropa ka ndërmarrë në muajt e fundit.
Ajo iu referua Planit ReArm Europe 2030 i cili do të mobilizojë 650 miliardë euro investime në mbrojtje gjatë katër viteve të ardhshme, dhe instrumentit financiar SAFE , me 150 miliardë euro kredi për prokurim të përbashkët në mbrojtje.
Presidentja e Komisionit theksoi se, që industria e mbrojtjes të jetë në gjendje të japë rezultate “me shpejtësi dhe shkallë” , duhet të krijohen kushtet e duhura.
Ajo përmendi si shembull kreditë SAFE , të cilat ofrojnë stimuj për prokurim të përbashkët dhe kontrata afatgjata.
“Kjo do t’i japë industrisë së mbrojtjes parashikueshmërinë që i nevojitet për të rritur prodhimin”, shpjegoi von der Leyen.
“Kjo është mënyra për të përshpejtuar dhe përmirësuar, jo individualisht, por së bashku me miqtë tanë më të besuar”, tha ajo.
Duke përfunduar, Presidentja e Komisionit paralajmëroi se në pesë vitet e ardhshme Rusia do të jetë në gjendje të testojë kapacitetin mbrojtës evropian, prandaj ajo theksoi se deri në vitin 2030 Evropa duhet të ketë gjithçka që i nevojitet për një “pengesë të besueshme”.
i.b./dita
