Sanksionet e reja të BE ndaj Rusisë, çfarë përfshihet në paketën e masave kundër Moskës

Ambasadorët e 27 vendeve anëtare të BE-së miratuan sot paketën e 16-të të sanksioneve kundër Rusisë për konfliktin në Ukrainë.

“Ambasadorët e 27 vendeve të BE-së ranë dakord për sanksione të reja kundër Rusisë”, raportojnë mediat e huaja.

Ky vendim do të miratohet zyrtarisht nga ministrat e jashtëm të 27 vendeve të BE-së të hënën më 24 shkurt.

Më pas sanksionet do të publikohen në Fletoren Zyrtare të BE-së dhe do të hyjnë në fuqi.

Paketa e 16-të e sanksioneve kundër Rusisë do të prezantohet, siç është planifikuar nga Brukseli, në përvjetorin e tretë të fillimit të luftës Rusi Ukrainë.

Miratimi i kësaj pakete ka një rëndësi të veçantë, mes frikës në Bruksel se Donald Trump do të përpiqet të heqë sanksionet amerikane ndaj Rusisë si pjesë e përpjekjeve të tij për të arritur një marrëveshje paqeje.

Paketa e 16 e sanksioneve që nga pushtimi në shkallë të gjerë në vitin 2022, përfshin një ndalim të importeve të aluminit rus në BE, i cili, sipas zyrtarëve të BE-së, gjeneron të ardhura të konsiderueshme për Rusinë.

Gjithashtu, sipas të dhënave të tyre, do të vendosen sanksione ndaj 73 anijeve që dyshohet se janë pjesë e “flotës hije”.

Këto 73 anije që besohet se po anashkalojnë kufirin e çmimit të naftës do të ndalohen nga portet e BE-së, edhe pse kjo nuk mbulon të gjithë flotën e cisternave që ndihmojnë Rusinë të shmangë sanksionet.

Gjithashtu në total, 48 persona dhe 35 subjekte do të përballen me ngrirje të aseteve dhe ndalime udhëtimi, megjithëse emrat e tyre nuk janë zbuluar ende.

BE-ja gjithashtu do të heqë licencat e transmetimit për 8 media ruse dhe do të përjashtojë 13 banka nga sistemi ndërkombëtar i pagesave Swift.

j.l./ dita