Ka nisur dita e tretë e protestave në veri të Kosovës, ku serbët kërkojnë tërheqjen e Policisë dhe kryetarëve të rinj shqiptarë në selitë komunale të Zveçanit, Zubin Potokut dhe Leposaviçit.
Rrugët janë të mbushura me mbeturina, të cilat u hodhën një ditë më parë nga protestuesit. Policia dhe KFOR-i kanë nisur pozicionet për të ruajtur sigurinë.
Ushtarët e KFOR-it ngritën një barrikadë të re disa qindra metra larg ndërtesës së vetëqeverisjes lokale në Zveçan. Në kordon janë 20 policë me mburoja. Po ashtu, u mbyllën edhe afrimet e tjera në godinën e pushtetit vendor.
Punëtorët e Komunës së Zveçanit sot në mëngjes janë mbledhur para objektit të atij institucioni për të kërkuar kthimin në vendet e tyre të punës. Aktualisht janë rreth 100 prej tyre dhe më shumë po vijnë.
Anëtarët e KFOR-it ngritën një gardh rreth pesëdhjetë metra larg komunës dhe formuan një kordon. Situata në Zveçan tani për tani është e qetë, fëmijët edhe sot në mëngjes nuk janë në shkollë, ndërsa janë hapur disa dyqane me ushqime elementare.
Shefi i politikës së jashtme të BE-së, Josep Borrell ka reaguar për situatën në veri të Kosovës duke i kërkuar Kosovës që të shtensionojë menjëherë situatën. Borrell deklaron se aktet janë të papranueshme.
“Aktet e dhunshme, të kryera ndaj trupave të KFOR-it, mediave, civilëve dhe policisë janë absolutisht të papranueshme.
BE-ja u kërkon autoriteteve të Kosovës dhe protestuesve që menjëherë dhe pa kushte të ndalin përshkallëzimin e situatës. Ne presim që palët të veprojnë me përgjegjësi dhe të gjejnë menjëherë një zgjidhje politike përmes dialogut”, shkroi Borrell në Twitter.
j.l./ dita
