Deputeti shqiptar Shaip Kamberi e ka cilësuar “rrëmujë dhe albanofobi” situatën e djeshme në Parlamentin e Serbisë, ku u diskutua për Kosovën.
“Rrëmujë. Albanofobi. Mungesë elementare e sensit për realitetin në Kosovë. Kështu do ta kisha cilësuar seancën e sotme në parlamentin e Serbisë. Retorika e viteve të 90-ta në skenë”, shkroi Kamberi në Facebook.
Gjatë seancës në Kuvendin serb, Kamberi u shpreh se i gjithë faji për tensionet e ngritura kohëve të fundit, po i hidhet mbi Kosovën. Sipas tij, e gjithë kriza po personifikohet me figurën e kryeministrit Kurti.
“Albin Kurti nuk është as monstër e as terrorist. Ai është Kryeministër i zgjedhur në mënyrë legjitime i Qeverisë së Kosovës. Si të tillë do duhej ta pranonit dhe me të të arrinit marrëveshje”, ka thënë Kamberi teksa i është drejtuar Vuçiçit.
m.b./dita
