Ambasadori i SHBA-së në Hungari u shpreh se kryeministri Viktor Orban ndodhet në udhëkryq dhe se “ka ardhur koha” që ai të largohet nga Rusia dhe të forcojë marrëdhëniet e vendit me aleatët perëndimorë.
Kritika, jashtëzakonisht e drejtpërdrejtë për një ambasador të SHBA-së për politikën ndërkombëtare të një partneri të NATO-s shton presionin në rritje ndaj Orbanit për t’i dhënë fund përpjekjes së tij prej më shumë se një dekadë për të forcuar lidhjet me Rusinë.
“Hungaria ka arritur një moment të rëndësishëm për përcaktimin e rrugës qe do ndjekë”, tha David Pressman në një deklaratë.
“Ndërsa Rusia ka nisur një lufte te pajustifikueshme ndaj vendit fqinj, ka ardhur koha për marrëdhënie më të forta midis Hungarisë dhe aleatëve e partnerëve të saj transatlantikë”,tha Pressman.
Orban, i cili që nga viti 2010 ndjek një “demokraci joliberale” të modeluar sipas stilit të qeverisjes së Putinit, ka qenë një gjemb në këmbë për partnerët e Hungarisë të Bashkimit Evropian dhe NATO-s.
Orban ka kritikuar sanksionet e BE-së kundër Rusisë, ka refuzuar dërgimin e ndihmës ushtarake në Kiev dhe ka zvarritur përpjekjet e Finlandës dhe Suedisë për t’u bashkuar me aleancën e mbrojtjes.
Administratës së tij i është ndërprerë pjesa më e madhe e financimit të BE-së për shkak të shqetësimeve rreth korrupsionit dhe sundimit të ligjit.
Komentet e Pressman – pas takimeve në Uashington në fillim të kësaj jave me zyrtarë të lartë të Shtëpisë së Bardhë dhe Sekretarin e Shtetit Antony Blinken – përshkallëzojnë një përplasje mes SHBA-së dhe Hungarisë.
Udhëheqësi hungarez dhe ministrat e tij, si dhe disa media hungareze tw sponsorizuara nga shteti, sulmojnë rregullisht SHBA-në për ndërhyrje në punët e brendshme të Hungarisë.
Gjatë takimeve të tij në Uashington, Pressman tha se ai diskutoi “retorikën unike anti-amerikane nga zyrtarë të lartë hungarezë dhe retorikën e përhapur anti-amerikane në mediat e kontrolluara nga Qeveria e Hungarisë”.
