Kryeministri i vendit, Edi Rama ka reaguar pas veprimit të Kreut të Partisë “Mundësia”, Agron Shehaj, i cili mori dokumentin e klasifikuar të marrëveshjes me SHBA-në. Përmes një reagimi në rrjetet sociale, Rama shprehet se nuk shpreson që prokuroria t’i tregojë vendin e përcaktuar nga ligji për grabitësit e dokumentave të klasifikuar.
Më tej, Rama tha se Shehaj tentoi të ikte me vrap njësoj si ballistët pasi hynin në kotec për të grabitur pula, duke na dëshmuar botërisht se vesi del me shpirtin. Lideri i qeverisë, u ndal edhe tek vajza e cila u aksidentua, teksa po ndiqte Shehajn. Në lidhje me këtë, ai u shpreh falenderues për faktin që ajo shpëtoi pa dëme serioze nga rendja në panik pas Shehajt.
Rama: Ky tipi që vjedh një dokument të klasifikuar dhe ia fut vrapit, është një ballist që ngre dhe ul hajdut kë i del përpara, por siç e shihni sot tentoi të ikte me vrap njësoj si ballistët pasi hynin në kotec për të grabitur pula, duke na dëshmuar botërisht se vesi del me shpirtin.
Uroj po nuk shpresoj që prokuroria t’i tregojë vendin e përcaktuar nga ligji për grabitësit e dokumentave të klasifikuar kësaj sorre vjedhacake të mbushur me urrejtje, ndërkohë që i shpreh keqardhje vajzës së pafajshme duke falenderuar Zotin që shpëtoi pa dëme serioze nga rendja në panik pas hajdutit.
Një moment i pazakontë ndodhi dje në ambientet e Kuvendit, ku kreu i Partisë “Mundësia”, Agron Shehaj “rrëmbeu” kopjen e vetme të marrëveshjes sekrete me SHBA-në, duke u larguar më pas me vrap nga ambientet e Kuvendit.
Pasi Shehaj merr kopjen, një nga punonjëset e Kuvendit e ndjek nga pas. “O zotëri të lutem…” dëgjohet ti thotë punonjësja e Kuvendit deputetit Agron Shehaj.
Sekretariati për Procedurat, Votimet dhe Etikën do të mblidhet ditën e martë për të shqyrtuar kërkesën e Partisë Socialiste për marrjen e një mase disiplinore ndaj deputetit Agron Shehaj, pas incidentit të ndodhur në ambientet e Kuvendit me dokumentin e klasifikuar.
Partia Socialiste kërkon përjashtimin e Shehajt nga punimet e Kuvendit për 60 ditë, si edhe referimin e çështjes në Prokurorinë e Posaçme (SPAK).
j.l./ dita
