Pas vetëm një sezoni me fanellën e Chelseat, ku vuajti si në aspektin personal, ashtu edhe atë të ekipit, senegalezi Koulibaly duket e do të largohet nga Londra për një tjetër aventurë.
Mbrojtësi ka arritur marrëveshjen për t’u transferuar në Arabinë Saudite, ku klubi i Al Hilal e ka bindur të firmosë një kontratë 3-vjeçare me pagë prej 30 milionë eurosh në sezon, ose 4 herë më shumë sesa fiton te Chelsea.
Ndërkohë edhe klubi londinez ka arritur një akord verbal me drejtuesit e Al Hilal dhe pritet që transferimi të kompletohet shumë shpejt, me Koulibaly që pritet të nisë një etapë të re të karrierës së tij.
Merr fund kështu dëshira e Interit për ta rikthyer Koulibaly në Serinë A, teksa vlen të theksohet se Arabia Saudite nuk ndalet në rrugën drejt transferimit të sa më shumë yjeve të futbollit, për të krijuar një ligë konkurruese në vend.
Koulibaly është vetëm futbollisti i radhës që transferohet në Superligën saudite, teksa më herët kanë shkuar atje edhe emra si Cristiano Ronaldo, Karim Benzema e Ngolo Kante.
