Federata e Sindikatave të Shëndetësisë në Kosovë zhvilloi një protestë të enjten, duke bllokuar hyrjen e Ministrisë së Shëndetësisë. Sindikalistët, me pankarta në duar, parashtruan kërkesat e tyre për rritjen e pagave, të cilën e konsiderojnë të pamjaftueshme sipas propozimeve të qeverisë.
Protestuesit shprehën pakënaqësinë e tyre ndaj propozimit për rritjen e koeficientit të pagave, duke e cilësuar si të papërshtatshme dhe të pamjaftueshme. Kryetarja e sindikatës, Tevide Imeri, akuzoi qeverinë për mungesë të dialogut social, duke theksuar se “kjo qeveri nuk dëshiron sindikata, e as dialog social.”
“Na kanë sjellë në këtë situatë pas gjithë kësaj kohe. Si federatë kemi qenë të prirur për të udhëhequr dialogun social dhe kemi dhënë një hapësirë të mjaftueshme për reflektim. Megjithatë, kjo ministri nuk ka dhënë asnjë sinjal për bashkëpunim me sindikatat,” tha ajo gjatë protestës.
Sindikalistët paralajmëruan se protestat do të vazhdojnë deri në përmbushjen e kërkesave të tyre. Protesta u zhvillua pa incidente, ndërsa për mbarëvajtjen e saj u kujdes Policia e Kosovës.
i.b./dita
Sindikatat e shëndetësisë nuk kanë pse të bëjnë protestë sepse qeveria jonë i ka krijuar të gjitha kushtet se si të rrjepin deri në palcë të gjithë popullin, nga pensionisti, që ska ku ta kafshojë dhe qeni, deri tek qytetari më i thjeshtë. Shteti thotë falas, qytetari e paguan me qimet e kokës, nuk po e kuptojmë këtë punë