Autoritetet kanë shpallur në kërkim 67-vjeçarin Arjan Telhallarin si dhe djalin e tij, 24-vjeçarin me iniciale L.Telhallari, si personat përgjegjës për ngjarjen e ditës së djeshme të ndodhur pranë zyrës elektorale të Partisë Socialdemokrate në zonën e “Ali Demit” në kryeqytet.
Referuar njoftimit të policisë, ngjarja ka nisur në një lokal aty pranë teksa 24-vjeçari është konfliktuar për motive të dobëta me Lendi Palaj.
Pas konfliktit 24-vjeçari është larguar nga vendi i ngjarjes dhe është rikthyer më pas me babanë e tij, Arjan Telhallarin, i cili dyshohet se me vete ka pasur dhe armë zjarri.
Arjan Telhallari ka kërkuar në zonë 27-vjeçari me të cilin ishte konfliktuar më parë djali i tij, moment në të cilin ka dëmtuar dhe fasadën e zyrës elektorale të PSD-së të ndodhur në zonë.
Njoftimi i policisë:
Specialistët për Hetimin e Krimeve të Komisariatit të Policisë Nr. 1: shpallën në kërkim shtetasit L. T., 24 vjeç dhe A. T., 67 vjeç, pasi nga hetimet e kryera rezultoi se ditën e djeshme, në një lokal, në rrugën “Ali Demi”, fillimisht janë konfliktuar për motive të dobëta, 24-vjeçari dhe 1 shtetas tjetër.
Pas konfliktit, shtetasi L. T. është larguar nga vendngjarja, ku është rikthyer më pas, me babanë e tij, shtetasin A. T., i cili dyshohet se ka patur armë me vete.
Ata kanë kërkuar në zonë, 27-vjeçarin me të cilin ishte konfliktuar shtetasi L. T., dhe gjatë kësaj kohe kanë dëmtuar me send të fortë, xhamin e një zyre elektorale që ndodhet në këtë zonë.
Punohet për kapjen e shtetasve të implikuar në këtë rast dhe për zbardhjen e rrethanave.
Sakaq ditën e djeshme autoritetet njoftuan se në zonë janë gjetur dhe dy fishekë të paplasur, ndërsa u dyshua se Arjan Telhallari ishte konfliktuar me persnat që ndodheshin brenda zyrës së Partisë Socialdemokrate.
i.b./dita
