Reshjet e dendura të shiut, të cilat nisën pas mesnatës dhe vijuan me intensitet deri në orët e para të mëngjesit, kanë shkaktuar probleme të shumta në qytetin bregdetar të Durrësit.
Përmbytje të konsiderueshme janë regjistruar në disa rrugë kryesore, banesa dhe biznese, veçanërisht në katet e para të godinave, ka patur ndërprerje të energjisë elektrike ndërsa gjithashtu mendohet të kemi dhe një viktimë, pasi një i moshaur ka rënë në kontakt me rrymën elektrike ndërsa lëvizte në trotuar.
Reshjet e shiut që kanë nisur që pas mesnatës dhe kanë vijuar deri në orët e para të mëngjesit, kanë krijuar një situatë problematike sa i takon rrugëve të qytetit të Durrësit, pasi ka prezencë uji dhe ka pasur përmbytje në disa banesa e biznese në katet e para. Por fatmirësisht nuk janë shënuar shumë dëme materiale.
Rrethrrotullimi te Stacioni, shëtitorja Taulantja, rruga që të çon në zonën e Currilave, Shkozetit dhe të plazhit, thuajse të gjitha segmentet kanë prezencë të lartë uji, duke vështirësuar qarkullimin e automjeteve dhe këmbësorëve, të cilët e kanë pasur të vështirë të kalojnë nga njëra anë në anën tjetër të rrugës, pasi është orari që shkojnë në shkollë ose në punë.
Fatkeqësisht, moti i keq ka marrë dhe një jetë. Një i moshuar ka humbur jetën pasi ka rënë në kontakt me energjinë elektrike teksa po ecte në një nga trotuaret e qytetit.
Situata është përkeqësuar më tej nga ndërprerjet e energjisë elektrike që kanë prekur jo vetëm pjesë të qytetit, por edhe zonën industriale të Porto Romanos, ku ndodhet edhe një nga hidrovorët kryesorë.
Grupet e emergjencës civile dhe punonjës të bashkisë janë angazhuar që në orët e para për pastrimin e pusetave dhe lirimin e rrugëve nga uji. Megjithatë, situata është përsëritje e problematikave të njohura që ndodhin sa herë ka reshje të dendura, për shkak të sistemit të kanalizimeve të amortizuar dhe mungesës së mirëmbajtjes.
j.l./ dita
