Një shpërthim me lëndë plasëse ka ndodhur mbrëmjen e djeshme në qytetin e Vlorës. Bëhet me dije se lënda plasëse i është vendosur në një dyqan motorash në dritare.
Kamerat e sigurisë pranë servisit të motorëve ku ndodhi shpërthimi me lënë plasëse në Vlorë kanë filmuar një person i cili i afrohet biznesit. Bazuar në këto filmime mësohet se policia po punon për identifikimin e tij.
Nga ana tjetër, bëhet me dije se pronari i servisit të motorëve, Viktor Bezhani ka deklaruar se nuk ka konflikte me njeri.
“Kam 30 vite që u shërbej banorëve të Vlorës, që nga biçikletave deri te motorët dhe nuk kam pas asnjë konflikt. Nuk e di pse ma kane bërë këtë dëm”, ka thënë ai.
Sipas informacioneve, në momentin e shpërthimit, nuk ka patur njeri në biznes. Edhe pse shpërthimi ka tronditur qytetin në mbrëmje, policia bën me dije se si pasojë janë shkaktuar vetëm dëme të vogla materiale.
Njoftimi i Policisë:
Vlorë/Informacion paraprak
Rreth orës 23:00, në lagjen “Bashkimi”, në dritaren e një servisi motorësh, në pronësi të shtetasit V. B., ka shpërthyer një sasi lënde e dyshuar plasëse, ku si pasojë janë shkaktuar vetëm dëme të vogla materiale.
Në vendngjarje ndodhet grupi hetimor, i cili vijon punën për zbardhjen e rrethanave të ngjarjes dhe identifikimin e autorit/ëve të dyshuar.
j.l./ dita
