Shqipëria renditet e teta në Eurovision, fitoren e merr Austria, ja si votuan për vendin tonë

Shqipëria u rendit në vendin e 8-të në Eurovision Song Contest 2025 përfaqësuar nga Shkodra Elektronike me këngën “Zjerm” teksa kompeticioni u mbajt në Basel të Zvicrës.

Performanca u karakterizua nga energji dhe një vizualitet që solli në skenë simbole kombëtare në një formë bashkëkohore. “Zjerm” u dallua për stilin e tij të veçantë dhe përpjekjen për të përfaqësuar një identitet muzikor modern që nuk harron rrënjët.

Përmes një skenografie të kuruar, kënga përcolli një mesazh për bashkëjetesë kulturore duke lënë gjurmë me origjinalitetin e saj. Kënga përfaqësuese e vendit tonë mori në total 218 pikë. Juritë profesioniste të vendeve që merrnin pjesë e vlerësuan Shqipërinë me 45 pikë në total teksa Franca ishte i vetmi vend që vlerësoi këngën “Zjerm” me 12 pikë, maksimalet.

Mali i Zi ishte gjithashtu një tjetër vend që vlerësoi Shqipërinë me pikë të larta duke dhënë në total 10 të tilla. Italia nga ana tjetë e vlerësoi performancën e Shqipërisë me vetëm 3 pikë. Ndryshimi i rezultatit erdhi nga votat e publikut nga ku Shqipëria mori 173 pikë.

Austria u shpall fituese e Eurovision Song Contest 2025 mbajtur në Bazel të Zvicrës me këngëtarin me origjinë filipinase, JJ me këngën “Wasted Love”. Me një zë kontratenor të veçantë dhe një skenografi që përshkruante një varkë në mes të skenës, JJ emocionoi audiencën dhe juritë evropiane me një baladë për një dashuri platonike dhe të parealizuar.

Kështu, Austria arriti një total prej 436 pikësh, duke marrë 178 pikë nga televotimi i publikut dhe duke qenë një nga këngët më të vlerësuara edhe nga juritë profesioniste të vendeve pjesëmarrëse.

Në vendin e dytë u rendit Izraeli me 357 pikë, në një edicion të shënuar nga përplasjet në qendër të qytetit të Bazelit mes policisë dhe protestuesve pro-palestinezë, disa prej të cilëve tentuan të hynin edhe në skenë gjatë performancës së këngëtares izraelite, Yuval Raphael.

Vendi i tretë në kompeticion u mor nga Estonia me një total prej 356 pikësh e përfaqësuar nga Tommy Cash me këngën Espresso Macchiato.

j.l./ dita