Zgjerohet lista e degëve të cilësuar prioritet kombëtar, ndjekja e të cilave do të mbulohet me bursë mujore në vlerën e pagës minimale.
Për vitin e ri akademik 2023-2024, të gjithë maturantët që do të pranohen për të ndjekur studimet e larta në degët e mësuesisë për profilet: Arsim fillor, Arsim parashkollor, apo programet Histori-gjeografi, Inxhinieri matematike, si dhe Inxhinieri fizike, do të mund të përfitojnë bursë studimi në vlerën e pagës minimale.
Ndryshe nga sa ka ndodhur një vit me parë, mbështetja e studentëve me bursë do të bëhet sipas një numri të detajuar kuotash që do të përcaktohen për çdo universitet. Në varësi të kuotave, do të jenë vetë strukturat e arsimit të lartë që do të konfirmojnë studentët që do të përfitojnë pavarësisht notës mesatare. Por, gjithmonë përzgjedhja do të bëhet duke plotësuar kriteret e pranimit për çdo program studimi, njësoj si të gjithë studentët e tjerë.
Duke nisur nga viti i ri akademike, studenti përfitues nuk ka më detyrimin të ruajë mesataren e shkollës së mesme, me të cilën ka përfituar bursën, me qëllim që mbështetja financiare të zgjasë përgjatë gjithë periudhës së studimeve.
p.k\dita
