A ekziston një kërkesë e dytë për arrestimin e Ballukut e dorëzuar dy javë më parë në Kuvend?

Sipas burimeve nga brenda Kuvendit të Shqipërisë, Prokuroria e Posaçme ka dorëzuar 15 ditë më parë një kërkesë të dytë të pa bërë publike për heqjen e mandatit dhe arrestimin e ish-zëvendëskryeministres Belinda Balluku, me akuza të reja të cilat lidhen me sekuestrimin e vilës në Dhërmi, dyshuar si një nga pronat e fshehura të Ballukut.

Kjo vjen 6 muaj pas kërkesës së parë të SPAK-ut, e cila u rrëzua në 12 mars në seancë plenare me 82 vota të mazhorancës.

Sipas të njëjtave burimeve, kjo situatë ka shkaktuar tensione në administratën e Kuvendit, deri edhe në presion për largim nga puna të personit që e ka protokolluar kërkesën.

Megjthatë deri më sot për këtë kërkesë nuk ekziston njoftim në faqen e Prokurorisë së Posaçme apo në atë të Gjykatës së Posaçme, shkruan Vox News.

Ditën e djeshme ka reaguar edhe kreu i grupit parlamentar të Partisë Demokratike Gazment Bardhi. Sipas tij sekuestrimi nga SPAK i vilës në Dhërmi, e rëndon pozitën penale të Ballukut dhe duhet ta detyrojë Prokurorinë e Posaçme të veprojë menjëherë – duhet t’i drejtohet Kuvendit për heqjen e mandatit dhe të kërkojë arrestimin. Në logjikën e prononcimit të Bardhit, drejtësia ende nuk ka bërë një kërkesë të dytë për arrestimin e ish-zëvendëskryeministres.

Ajo që nuk shpjegohet nuk është heshtja e mundshme e mazhorancës dhe kryeministrit Rama, i cili e ka varur fatin e vet tek ai i Ballukut, por heshtja e SPAK-ut..

Cila është e vërteta? A ekziston një kërkesë e dytë e dërguar 15 ditë më parë në adresën e Kuvendit të Shqipërisë? Nëse po, pse SPAK-u nuk e ka bërë publike? Cila do të ishte arsyeja e mungesës së njoftimit së Prokurorisë së Posaçme?

Ndërkohë që raportimet për këtë kërkesë të dytë po shtohen, SPAK ka detyrim publik të sqarojë ekzistencën ose jo të një vendimi të tillë të rëndësishëm.