Zbardhet ekspertiza për vdekjen e dy vëllezërve Sabri dhe Novruz Velaj 90 dhe 85 vjeç të cilët u gjetën të vdekur një ditë më parë në banesën e tyre në fshatin Çorrush të bashkisë Mallakastër prej banorëve të lagjes.
Burime zyrtare nga Policia e Fierit, bëjnë te ditur se dy vëllezërit të cilët ishin të pa martuar dhe jetonin vetëm, banonin në një godinë me dhoma të veçanta dhe kanë ndërruar jetë katër apo pesë ditë më parë.
Sipas ekspertizës, njëri prej tyre ka tentuar të veshë ose të heqë pantallonat, por ka humbur ekuilibrin dhe ka rënë në dysheme. Në rënie, ai ka goditur kokën dhe si pasojë e hematomës dhe moshës ka ndërruar jetë ndërkohë që dera e dhomës ka qënë e mbyllur.
Ndërkohë, vëllai tjetër, i paralizuar prej vitesh dhe që rrinte në dhomën tjetër, pasi ka dëgjuar zhurmën, ka tentuar të hapë derën, por nuk ka mundur dhe në këtë përpjekje, dyshohet se ka ndërruar jetë.
Sipas burimeve zyrtare të Policisë, dy vëllezërit Novruz dhe Sabri Velaj kanë ndërruar jetë në të njëjtën ditë, rreth pesë ditë më parë.
Ata jetonin vetëm me pensionet e pleqërisë dhe nuk kishin të afërm. Banesa e tyre ishte rikonstruktuar tre vjet më parë nga bashkia Mallakastër.
j.l./ dita
