Pritet të luhet më ndryshe sesa në Varshavë. Kombëtarja shqiptare duhet të jetë më sulmuese në “Air Albania” ndaj Moldavisë sesa ishte në Poloni, dhe trajneri Silvinjo e di se pritet fitorja. Për këtë arsye, braziliani ka vendosur të vendosë ekipin në fushë me një skemë më sulmuese.
Burime pranë stafit kuqezi tregojnë se do të forcohet mesfusha duke u rreshtuar me 5 lojtarë, në ndihmë të sulmit që do të jetë i njëjtë si në ndeshjen e parë eliminatore të Europianit. Me këtë lëvizje, do të kalohet në mbrojtjen me 3 lojtarë, pak a shumë siç bënte Reja, ndonëse mesi i fushës do të ketë 4 dhe jo pesë futbollistë siç ishte në kohën e ish-trajnerit italian.
Në sulm pritet të jenë 3 lojtarë ashtu si edhe në Varshavë, e besohet se Cikalleshi do të jetë në qendër dhe Uzuni e Asani në ndihmë të tij. Ndërkaq, kombëtarja vazhdon përgatitjet dhe me ekipin u bashkua Sokol Cikalleshi që përfundoi sezonin në Arabinë Saudite. Silvinjo është në pritje të plotësimit të ekipit me lojtarët nga Italia dhe Spanja.
Kombëtarja shqiptare po i vijon përgatitjet në ditën e tretë të grumbullimit për dy ndeshjet zyrtare të kualifikueseve të Euro 2024 ndaj Moldavisë dhe Ishujve Faroe. Stafi teknik me në krye trajnerin Silvinjo ka punuar sot paradite me një grup prej 16 lojtarësh, të cilët janë impenjuar më shumë në ushtrime shkrythëse në sallën e forcës dhe më pas në ushtrime me topin, duke provuar situata të ndryshme loje.
Seanca e radhës stërvitore ka zgjatur për rreth një orë, ndërsa gjithçka ka shkuar normalisht dhe nuk ka probleme fizike për lojtarët. Grupi është në pritje për t’u plotësuar edhe me lojtarët e tjerë që janë në listën me 26 emra ë ditët në vazhdim, ndërkohë që sot do të ketë edhe një seancë të dytë stërvitore në orët e pasdites po në Shtëpinë e Futbollit.
