Sizmiologu Shyqyri Aliaj ka shpjeguar gjatë një interviste televizive se tërmetet shkatërrimtare janë të pritshme për Turqinë, si pasojë e zonës sizmike në të cilën shtrihet ky shtet. Profesor Aliaj e përjashtoi mundësinë e një rreziku të tillë për Shqipërinë, pasi sipas tij vendi jonë shtrihet në një tjetër pllak të Tokës që nuk ndikohet nga pllaka aziatike ku ka ndodhur tërmeti.
“Tërmeti i Turqisë sot, goditi Turqinë lindore kufirin me Sirinë dhe ka prekur pothuajse gjithë Lindjen e Mesme, Siri, Jordani, Izrael, është ndjerë e fortë dhe magnituta ka qenë 7.8 ballë. Tërmetet e Shqipërisë siç e keni parë ndër vite, nuk ka tërmete të tillë Shqipëria, ajo ka tërmete maksimumi 7 ballë. Sepse kufinjtë e pllakave tektonike janë mes Greqisë dhe Turqisë dhe ne jemi një pllakë më vete që shkojnë deri në 7 ballë si tërmeti i nëntorit.
Kështu që nuk bëhet fjalë asnjëherë që të bjerë ndonjë tërmet i fuqishëm tani, ndoshta pas 100 vjetësh ndonjë si tërmeti i Durrësit i 2019. Ne kemi tërmet tektonik dhe jo tërmete vullkanike si kanë vende të tjera, asnjë rrezik nuk ka për Shqipërinë. Tërmetet janë thellë nën tokë, nga 10 deri në 25- 30 kilometra në kufijtë e pllakave, ndërsa në buzë të oqeaneve shkojnë deri në 720 km thellë si Japonia, Kina.
Populli jonë duhet të qetësohet sepse është ndryshim shumë i madh mes 8 ballë dhe 7 ballë që është maksimumi i Shqipërisë sepse ne nuk kemi pasur dhe nuk do kemi, ndërsa Turqia ka pasur ka dhe do ketë tërmete të tillë”, shprehet Aliaj.
m.b./dita
