Sot Samiti BE-Ballkani Perëndimor në Mal të Zi, Rama: Do të hapë shtigje të reja për vendet tona

Kryeministri i Malit të Zi, Milojko Spajiç, do të presë këtë të enjte (16 maj) në Kotorr një samit të liderëve të Ballkanit Perëndimor dhe Bashkimit Evropian. Samiti organizohet nën sloganin “Një rajon, vizion i përbashkët” (One region, common vision) dhe raportohet se liderët e vendeve të rajonit, përfaqësues të Bashkimit Evropian dhe Shteteve të Bashkuara do të diskutojnë Planin e Rritjes për Ballkanin Perëndimor. Të pranishëm pritet të jenë kryeministër i Shqipërisë Edi Rama, Albin Kurti kryeministër i Kosovës dhe Talat Xhaferi i Maqedonisë së Veriut.

Gjithashtu marrin pjesë edhe Komisioneri Evropian për Fqinjësinë dhe Zgjerimin Oliver Várhelyi dhe Ndihmës sekretari i Shtetit amerikan për Evropën dhe Euroazinë, James O’Brien. Përveç liderëve dhe ministrave nga vendet e rajonit, do të jenë edhe organizatat partnere si Këshilli i Bashkëpunimit Rajonal, Banka Evropiane për Rindërtim dhe Zhvillim, Banka Evropiane e Investimeve, Banka Botërore, Komuniteti i Transportit, Aleanca Atlantike, Komuniteti i Energjisë, Fondacionet e Shoqërisë së Hapur, ReSPA, GIZ, përfaqësues të lartë të Komisionit Evropian dhe të tjerë.

Kryeministri Edi Rama pak para nisjes së Samitit, në një komunikim për gazetarët, tha se ky proces është shumë i rëndësishme për të krijuar mundësit të reja për vendet e Ballkanit. Ai shtoi se ky proces gjithashtu krijon mundësi për t’u integruar në Bashkimin Europian.

“Së pari do doja të thoja që jam shumë i zhgënjyer që Mali i Zi nuk arriti të na priste me mot me diell, por na priti me një shi gjerman. Sa i takon të tjerave çdo gjë është në rregull dhe ne jemi gati për një sesion të ri të këtij procesi inkurajues që do të hapë shtigje të reja për vendet tona për t’u integruar në BE dhe në tregun e vetëm të tij, duke krijuar shanse të reja për njerëzit.

Ideja që brenda këtij viti mund të sigurohemi që transfertat financiare të qytetarëve tanë nga BE në vendet tona, do të jetë shumë më i lehtë pasi nuk do të kemi barrën e shpenzimeve që kanë pasur edhe dicka shumë pozitive. Sa i takon të tjerave duhet të punojmë”, tha Rama.

j.l./ dita