Sprovat e 8 tetorit: Pse qytetarët duhet ta mbajnë Berishën larg kauzës së tyre

Redaksionale

​Tubimi i paralajmëruar për datën 8 tetor përpara Kryeministrisë po mbërrin në një moment kritik për vendin. Nga njëra anë janë qytetarët, socialistët e zhgënjyer dhe njerëzit e thjeshtë që kërkojnë ndryshim të sistemit. Nga ana tjetër është Partia Demokratike e Sali Berishës, e cila kërkon të mbivendosë hijen e saj mbi çdo reagim spontan shoqëror.

Paralajmërimi për rrezikun e përplasjeve dhe provokimeve është një alarm politik, nuk është vetëm logjistik. Qytetarët duhet të shmangin me çdo kusht përzierjen me Sali Berishën dhe strukturat e tij.

Shqipëria sot ndodhet e fundit në zhvillim ndërmjet vendeve ish-komuniste jo nga ndonjë fat i keq historik, por si pasojë e një sistemi kanceroz tre-dekadash. Në këtë sistem, Berisha nuk është “opozitari i pamposhtur”, por pjesë përbërëse e tij.

Ai është arkitekt i djeshëm si ish-qeverisës dhe ortak i sotëm në ndarjen e pushtetit ekonomik e oligarkik me Rilindjen. Lufta e tyre ditën përballë kamerave është thjesht teatri publik i një ortakërie që natën ndan interesat, lejet e ndërtimit dhe ruajtjen e status-quosë.

​Historia politike e Berishëse e ka dëshmuar qartë karakterin e tij të ulët, siç edhe ka treguar se për pushtet dhe mbijetesë personale, ai nuk njeh asnjë kufij e normë morale.

Edhe ata të rinj që ndoshta nuk e njohin, mjaton të sjellin në kujtesë protestën e madhe studentore të disa viteve më parë. Një lëvizje e pastër, rinore dhe shpresëdhënëse, e cila u minua, u përça dhe u mor nën kontroll nga strukturat e PD-së dhe ish-LSI-së. Rezultati? Kauza u zbeh, studenti u tradhtua dhe Rama e shpëtoi karrigen e tij i paprekur.

​Të njëjtin skenar po tentojnë të luajnë edhe këtë herë. Futja e Berishës në mes të protestuesve qytetarë nuk bëhet për të rrëzuar qeverinë, por për t’i bërë shërbimin e radhës sistemit. Sapo propaganda e PD-së të shfaqet në shesh, makineria mediatike e kryeministrit dhe ushtria e tij e militantëve do të fillojnë korin e zakonshëm: “Ja, kjo është thjesht protesta e Saliut!” Në këtë mënyrë, revolta e drejtë qytetare fshihet dhe reduktohet në një luftë të vjetër llogoresh mes dy pjesëve të së njëjtës monedhë.

Këtyre u intereson vetëm vijimi i militantizmit të verbër dhe ruajtja e tifozerive politike që mban gjallë sistemin. Ndaj, protestuesve që kanë kryer një akt të pashembullt duke vijuar për më shumë se 4 muaj këtë sakrificë, u takon të parëve të ruajnë distancën dhe identitetin.

Mos lejoni që simbolet e një partie të vjetruar të mbulojnë fjalën dhe kërkesat tuaja qytetare. Refuzoni diversionin. Çdo tentativë e militantëve apo “të fortëve” të Saliut për t’u futur në mes apo në krye të turmës duhet të izolohet.

Kjo kauzë duhet mbrojtur nga përvetësimi. Nëse duam vërtet ndryshim, sovraniteti i sheshit duhet t’i mbetet qytetarit. Berisha dhe Rama janë dy anët e të njëjtit sistem. Braktisja e llogoreve të tyre false është hapi i parë drejt ndërtimit të një opozite të vërtetë shoqërore.

DITA