Andorra është një emër i vogël i futbollit evropian dhe jo i panjohur për Shqipërinë. Kombëtarja ka luajtur shtatë herë përballë vendit të vogël nga Pirenejtë.
Kuqezinjtë kanë regjistruar pesë fitore, një ndeshje në vitin 2019 është mbyllur në barazim, teksa në vitin 2002 Andorra na ka shkaktuar humbjen tronditëse 2-0 në miqësoren e luajtur në kryeqytetin e tyre Andorra la Vella.
Por, me gjithë rekordin pozitiv përballë ekipit të vogël, Shqipëria nuk e ka patur gjithmonë të lehtë. Mjafton të kujtohet që në dy përballjet e fundit, të vlefshme për kualifikueset e Botërorit 2022, Kombëtarja ka regjistruar dy fitore minimale në shtëpi dhe në transfertë.
Edhe këtë herë sfida nuk pritet të jetë e lehtë. Përfaqësuesja e cila pozicionohet në vendin e 171-të në renditjen botërore të FIFA-s do të luajë në Tiranë për tu mbrojtur. Synimi do të jetë të mos pësojnë gol dhe mundësisht të shfrytëzojnë kundërsulmet për të goditur kuqezinjtë.
Andorra është shansi i madh i Shqipërisë për të vendosur kualifikueset e Kupës së Botës në rrugën e duhur.
Me tri pikë në përballjen e sotme, ekipi i Sylvinho-s do të vendoset në pozita të mira për të nisur ofensivën për vendin e dytë në Grupin K, ku si rivalë kemi Serbinë.
d.t/dita
