Vetëm 3 minuta para se dhjetëra plumba kallashnikovi të shkreheshin në drejtim të kanalit Top Channel, gazetarët e fundit të kësaj medie ishin larguar nga ambientet e punës së tyre.
Nuk dihet nëse agresorët pritën që gazetarët të iknin apo thjesht rastësia e 3 minutave shmangu një masakër.
Pas sulmit, një ‘Range Rover’ është gjetur më pas e djegur në Golem të Kavajës me 2 kallashnikovë. Njoftimet e para thonë se është vjedhur në Shkodër.
Ndërkohë që një tjetër mister që e mbulon ngjarjen është edhe fakti që lidhet me targat e makinës. Targa ishte vjedhur para një muaji nga një makinë e regjistruar në Elbasan.
Targat kanë qenë në pronësi të një kameramani të emisionit të ‘Top Channel’ ‘Inside Story’, i cili vetëm pak kohë më parë e kishte shitur te një kushëri. Ky i fundit kishte denoncuar vjedhjen e targave.
