Sekretari amerikan i Shtetit, Antony Blinken, tha se në takimin e ministrave të Jashtëm të NATO-s, që po mbahet prej dy ditësh në Bruksel, është diskutuar edhe se Aleanca do të ndihmojë Ballkanin Perëndimor për një të ardhme euroatlantike.
“Aleanca e NATO-s është e bashkuar. Ne folëm për shumë tema në terren gjatë takimit të ministrave të Jashtëm, nga pritshmëritë tona në Samitin e Washingtonit vitin e ardhshëm, në mënyrat se si mund të thellojmë partneritetin tonë me Ukrainën, deri tek mënyra se si mund të ndihmojmë në mbështetjen e të ardhmes euroatlantike të Ballkanit Perëndimor”, shkroi Blinken në X rreth bisedimeve të zhvilluara në këtë takim.
Në takimin që filloi të martën (28 Nëntor), ministrat e Jashtëm të NATO-s në agjendë patën edhe Ballkanin Perëndimor, ku vëmendja kryesore ishte tek Kosova dhe Bosnja për shkak të rritjes së tensioneve.
Sekretari i Përgjithshëm i NATO-s, Jens Stoltenberg, ditën e djeshme tha para gazetarëve se Aleanca do të bëjë çfarëdo që nevojitet për të siguruar stabilitet në këtë rajon, duke thënë se paqja e Ballkanit Perëndimor është e rëndësishme për gjithë Europën dhe vetë NATO-n.
p.k\dita
