Mbledhje në selinë rozë, zbardhen porositë e Ramës për deputetët e Tiranës

Euronews Albania shkruan se ka mësuar porositë që kryeministri Rama u la deputetëve të qarkut Tiranë gjatë mbledhjes me dyer të mbylllura të mbajtur në selinë rozë këtë të premte.

Burime bëjnë me dije se kryesocialisti u ka kërkuar deputetëve të Tiranës që, për dy javë, të evidentojnë problematikat e qytetit përmes kontakteve të drejtpërdrejta me qytetarët. Pas këtij afati, deputetët do t’i paraqesin gjetjet e tyre në një tjetër takim.

Drejtuesja politike e Tiranës, Ogerta Manastirliu, dhe kryetarja e komanduar e Bashkisë së Tiranës, Anuela Ristani, do të bëjnë ndarjen e deputetëve dhe drejtuesve të njësive administrative në grupe pune.

Paraprakisht, grupet e punës janë strukturuar si më poshtë:

• Hapësirat publike: në krye të punës do të jenë Ogerta Manastirliu dhe Anuela Ristani.
• Çështja e trafikut: do të drejtohet nga Blendi Gonxhja dhe Enton Punavija.
• Financat: Do të koordinohen nga Petrit Malaj dhe Delina Ibrahimaj.

Në mbledhje Rama mësohet të ketë thënë se “nuk po e bëjmë këtë gjë për të menduar se do ketë zgjedhje apo jo”.

j.l./ dita