Gjykata ka caktuar masën e sigurisë “Arrest me burg” për Shkëlqim dhe Florjan Dukën, autorët e dyshuar të vrasjes së biznesmenit Eduart Reçi.
Gjatë seancës së mbajtur këtë të martë, dy vëllezërit e kanë mohuar akuzën se ata janë autorët e vrasjes së biznesmenit.
“S’jemi ne vrasësit”- kanë deklaruar ata në gjykatë.
Shkëlqim Duka, oficeri i policisë gjyqësore, dyshohet se është dhe qitësi që bëri të mundur ekzekutimin e biznesmenit mbrëmjen e 13 nëntorit.
Shkak i konfliktit është bërë një pronë në lagje, për të cilën biznesmeni ishte në konflikt me dy vëllezërit.
Ishin kamerat filmike që zbardhen ngjarjen. Nga pamjet hetuesit panë një person i cili pozicionohej për 5 ditë rresht në shkallën e emergjencës së një hoteli në zonë dhe nga ku bënte matje me një armë me dylbi drejt oborrit të biznesmenit.
Personi që bënte matje me armë u identifikua si Shkëlqim Duka.
Oficeri i OPGJ-së më datë 8 nëntor kreu dhe një qitje tjetër drejt biznesmenit që ndodhej në oborrin e pallatit, por pa mundur dot ta eliminojë atë.
Për ta nxjerrë biznesmenin në oborr, dy vëllezërit hidhnin fishekzjarre të fuqishme shumë pranë banesës së tij.
i.b./dita
