Për të patur një zemër të shëndetshme, duhen luajtur këmbët, thuhet në një studim të kohëve të fundit. Ecjet e gjata që ndihmojnë për djegien e kalorive, mund të përmirësojnë faktorët që ndikojnë në sëmundjet e zemrës. Madje, ecje të tilla, sipas studimit, rekomandohen edhe për personat që sapo kanë kaluar një sëmundje kardiake dhe janë në procesin e rehabilitimit apo rikthimit në jetën normale.
Për dekada, mjekët i kanë këshilluar pacientët që kanë përjetuar goditje në zemër, që të kryejnë ushtrime të lehta fizike, dhe tani studimi tregon se këta persona mund të jetojnë më gjatë sesa ata që nuk zbatuan këshillat e mjekut në këtë drejtim.
Këto këshilla kanë mbetur thuajse të pandryshuara që prej viteve 1970-të, por studimi i ri tregon se shëndeti i pacientëve mund të përfitojë edhe më shumë nëse ushtrimet fizike shtohen.
Mjekët pranë universitetit të Vermontit, morën në shqyrtim 74 pacientë që ndodheshin në procesin e rehabilitimit, pasi kishin pësuar goditje në zemër. 50 për qind e tyre kryen ushtrime fizike të zakonshme si ecje, ngasje biçiklete ose vozitje me varkë. Koha e ushtrimeve të tyre ishte 30 minuta, 3 herë në javë. 50 për qind e pacientëve të tjerë kryen ecje për 45 minuta deri 60 minuta, thuajse çdo ditë.
Pas 5 muajsh, pacientët që kishin kryer ecje të gjatë kishin një përmirësim më të madh në nivelet e sheqerit në gjak dhe kolesterinës, në tensionin e gjaku dhe ndjeheshin më mirë fizikisht. Ata, gjithashtu, humbën 10 kg të peshës trupore në krahasim me 4 kg që humbën pacientët e tjerë që kryen ushtrime të zakonshme e 3 herë në javë.
Ekspertët thonë se edhe ushtrimet pa shumë sforcime, si ecja, mund të ndihmojnë në djegien e mijëra kalorive në javë, nëse kryhen shpesh.
