Dy persona u vranë dhe pesë të tjerë u plagosën në një sulm me armë në Qendrën e Seattle-it të dielën në mbrëmje. Zëdhënësja e Departamentit të Zjarrfikësve të Seattle-it, Grace Nuñez, tha se ekipet e para të ndihmës mbërritën pak pas orës 6 të mbrëmjes dhe u përpoqën të shpëtonin jetën e dy të plagosurve, por pa sukses.
Ndërsa, katër nga të plagosurit u dërguan në Qendrën Mjekësore Harborview të Universitetit të Uashingtonit, qendra më e lartë e traumës në rajon. Të gjithë ishin qëlluar me armë zjarri dhe lëndimet përfshinin plagë në krah, këmbë, bark dhe pjesën e poshtme të këmbës.
Si pasojë e plagëve, një grua ishte në gjendje kritike dhe në operacion. Nuñez, nga departamenti i zjarrfikësve, tha gjithashtu se një paciente, një grua 40-vjeçare me lëndime të lehta, nuk pranoi të dërgohej në spital. Nga ana tjetër, kryetarja e bashkisë së Seattle-it, Katie Wilson, tha në një deklaratë se policia e qytetit mori në paraburgim një të dyshuar.
“Gjithashtu dua të falënderoj zjarrfikësit dhe personelin mjekësor të Seattle-it në Harborview të cilët po trajtojnë të plagosurit, si dhe stafin e Qendrës së Seattle-it dhe stafin e eventit dhe kalimtarët që ndihmuan njerëzit të arrinin në siguri dhe ofruan ndihmë në rrethana të tmerrshme”, tha ajo.
Me anë të një njoftimi, Departamenti i Policisë së Seattle-it u kërkoi qytetarëve të qëndronin larg ndërsa detektivët dhe oficerët po hetojnë shkaqet e plota të ngjarjes. Zyra e Byrosë Amerikane të Alkoolit, Duhanit, Armëve të Zjarrit dhe Eksplozivëve në Seattle tha në X se disa nga agjentët e saj specialë ishin në vendngjarje duke ndihmuar policinë e Seattle-it me hetimin.
j.l./ dita
