Janë liruar të tjerë pengje izraelite në orët e pasdites të së dielës. Hamasi konfirmoi se ka dorëzuar 14 pengje izraelite, 3 me kombësi tajlandeze dhe një rus, në duart e Kryqit të Kuq.
Ndërkohë, IDF sqaroi se bëhet fjalë për një shtetas me dy kombësi, ruse e izraelite, dhe bëhet fjalë në total për 17 pengje të lirë tashmë e të dorëzuar pranë autoriteteve izraelite. Mes pengjeve, më e vogla është një vogëlushe, e cila 4 vjeç i mbushi teksa mbahej peng nga militantët e Hamasit.
Ajo quhet Avigail Idan, e cila më 7 tetor, kur militantët e Hamasit hynë në shtëpinë e saj dhe i vranë prindërit, ia doli të shpëtojë e të dalë nga shtëpia, por pak metra më tutje u kap nga një grup tjetër.
Fill pas lajmit se të tjerë pengje u kthyen në Izrael, Presidenti amerikan Joe Biden tha se palët arritën në këtë moment falë edhe diplomacisë intensive amerikane, e cila, sipas shefit të Shtëpisë së Bardhë, vazhdon të kërkojë shtyrje të mëtejshme të armëpushimit. Por, pikëpyetja e madhe tashmë është: çfarë ndodh pas përfundimit të armëpushimit të hënën? Sipas marrëveshjes, nga 230 pengje në total, vetëm 50 do të lirohen. Për çdo të rikthyer në Izrael, ky i fundit është dakordësuar të nxjerrë nga burgu 3 palestinezë, grua apo adoleshentë.
Pavarësisht dëshirës për t’i liruar pengjet çdo ditë, Izraeli dhe ndërkombëtarët i frikësohen faktit se pushimi mund t’i sigurojë kohë Hamasit për t’u rigrupuar dhe për të organizuar mbrojtjen, përpara një rinisje të fushatës së bombardimeve nga Izraeli.
Në të njëjtën kohë, nëse lirimi i pengjeve do të rezultojë i suksesshëm edhe në ditën e katërt, qeveria e Tel Avivit mund të përballet me presionin në rritje për të negociuar për lirimin e çdo pengu. Ndërkohë, armëpushimi, edhe pse i përkohshëm, riktheu në Gaza paqen e qetësinë, që për palestinezët ishte harruar që nga nisja e luftës.
a.c./dita
