Tirana luan të enjten (19:00) duelin e kthimit të raundit të parë në Conference League përballë Dinamo Batumit. Bardheblutë e Orges Shehit, e mbyllën në barazim 1-1 takimin e parë kundër rivalëve gjeorgjianë, ndërkohë që në transfertë do të futen në fushë për t’u kualifikuar.
Gjatë konferencës për shtypin, trajneri Shehi theksoi se mund të bëjë ndryshime në formacionin e titullarëve. Ndërkohë që u shpreh se shanset e kualifikimit janë 50 me 50.
NDESHJA – ”Është ndeshja e dytë dhe kemi një informacion më të detajuar. Kërkojmë që të përmirësohemi dhe të bëjmë më mirë nesër. Duhet të jemi vigjilent e të kujdesshëm. Është ndeshje e hapur, 50/50”.
TIRANA – “Unë jam i kënaqur me kontingjentin. Pak rëndësi ka kush e nis nga fillimi dhe kush nga stoli. Në ndeshjen e parë, lojtarët e stolit u futën mirë në fushë, me objektivin e duhur për të ndryshuar ndeshjen”.
FORMACIONI – “Mund të ketë ndryshime nesër në formacion. Kur të futen ata nga stoli duhet të jenë të zotë të bëjnë mirë. Duke patur një grup të plotë nuk ka rëndësi kush e fillon, por të japim më të mirën e mundshme”.
FORMA – “Është e mirë, na është bashkuar edhe Kaina. Grupi është i plotë. Lushkja është lojtar i rëndësishëm. Ndeshjen e parë e nisi nga stoli dhe shënoi. Nesër mund ta nisë nga fillimi”.
TAKTIKA – “Në ndeshjen e parë, të dyja skuadrat patën mundësi të mbanin topin dhe të nisnin aksione pa presion. Në takimin e dytë do të ketë momente që mund të jesh në situata që ti nuk kërkon të presosh lart. Por kërkon të jesh në ekuilibër. Do të ketë situata të ndryshme”.
KUALIFIKIMI – “Të dyja skuadrat kanë shanse të njëjta. Ne do të luajmë shanset tona, duke qenë të vetëdijshëm që jemi në klubin më të titulluar në Shqipëri. Motoja jonë është të futemi në fushë si të barabartë me kundërshtarin. Fiton ai që shfrytëzon më mirë rastet”.
SKUADRA – “Duhet të kërkojmë të jemi të logjikshëm në nisjen e aksioneve, edhe tranzicioni është i rëndësishëm”./Supersport/
