Kreu i Bashkisë së Tiranës, Erion Veliaj deklaroi se vijojnë punimet për projektin e Unazës së Madhe e e cila do të lehtësojë ndjeshëm trafikun në Tiranë.
Gjatë një interviste në studion e ‘Real Story’ në Report TV, Veliaj tha se nëse opozita nuk do të bllokonte punimet, sot ky projekt do të kishte përfunduar.
Sipas Veliajt, aktualisht e gjithë pjesa lindore e Tiranës është liruar ndjeshëm, ndërkohë po punohet për zhbllokimin e nyjes së vetme që ka mbetur pa u hapur në pjesën lindore që është segmenti i “Rrugës së Elbasanit”.
Kryebashkiaku Veliaj tha se zgjidhja për këtë është heqja e terminalit të përkohshëm të autobusëve. Ne kemi filluar përgatitjet për terminalin e ri në Lundër dhe do të zhbllokohet edhe ajo nyje.
“Sot kemi bërë vetëm gjysmën e Unazës, pra nga sheshi “Shqiponja”, deri në Farkë të Madhe. Këtë pranverë fillojnë të 7 lotet. Sepse ato duhen edhe shpronësuar.
Ne kemi mbaruar deri në Farkë të Madhe dhe ndërkohë po vazhdon pjesa e Paskuqanit.
Ka pasur më pak ndërtime buzë lumit dhe kostoja e shpronësimit është më e lirë, se është një tjetër zona kadastrale ana e Kamzës dhe tjetër e Tiranës.
Po kur mendon që humbëm për një segment 3 vjet, kjo do të thotë se kritikët tanë, sidomos kur janë kritikë politikë, duhet të tregojnë kujdes sepse ishin autorët e bllokimit.
Ndërkohë që, unë besoj se do të lirohet ndjeshëm trafiku, siç është liruar trafiku te zona duke filluar nga “Shqiponja” tek “Astiri” në drejtim të Lundrës dhe deri në Farkë”, tha kryebashkiaku Veliaj.
