Një tragjedi e rëndë ka goditur Teksasin, ku përmbytjet kanë marrë jetën e të paktën 24 personave, ndërsa 25 fëmijë nga një kamp veror për vajza rezultojnë ende të zhdukur. Ngjarja e rëndë ndodhi më 4 korrik, Ditën e Pavarësisë së SHBA-së, duke kthyer festën në një ditë zie për dhjetëra familje.
Presidenti amerikan, Donald Trump, e cilësoi situatën si një “tragjedi tronditëse” dhe premtoi mbështetje të menjëhershme për autoritetet lokale. Guvernatori i Teksasit, Greg Abbott, konfirmoi se një operacion masiv kërkim-shpëtimi është duke vazhduar gjatë gjithë natës për të gjetur të mbijetuarit.
“Brenda vetëm 45 minutash, lumi Guadalupe u rrit me 26 metra, duke përmbytur gjithçka përpara dhe marrë me vete prona dhe, për fat të keq edhe jetë njerëzish,” tha zëvendësguvernatori i Teksasit, Dan Patrick.
Ekipet e emergjencës janë angazhuar me 14 helikopterë, 12 dronë dhe mbi 400 shpëtimtarë në terren, ndërsa deri më tani janë evakuuar mbi 237 persona. Autoritetet paralajmërojnë se ndërprerjet e telekomunikacionit po e bëjnë të vështirë kontaktin me shumë banorë, përfshirë edhe fëmijët e zhdukur në kampin veror.
“Ne i kuptojmë ankthin e prindërve. Fakti që nuk janë kontaktuar ende nuk do të thotë domosdoshmërisht që fëmijët e tyre janë humbur. Ata mund të jenë jashtë mbulimit telefonik,” shtoi Patrick, duke bërë thirrje për qetësi.
i.b./dita
