Administrata e presidentit Donald Trump ka urdhëruar Departamentin Amerikan të Bujqësisë dhe agjencitë e tjera federale të mbyllin faqet e internetit që përmbajnë informacion mbi ndryshimet klimatike dhe diversitetin gjinor.
Vendimi çoi në mbylljen e disa faqeve kryesore të Shërbimit Pyjor të SHBA-së (USFS), përfshirë ato që ofronin vlerësime të ndikimeve klimatike, udhëzime për përshtatjen ndaj ndryshimeve të motit dhe instruksione për menaxhimin e zjarreve. Në vend të mbylljes totale, disa faqe shfaqnin mesazhin: “Ju nuk jeni të autorizuar për të hyrë në këtë faqe.”
Ky hap vjen si pjesë e një serie urdhrash ekzekutivë të Trump, të cilët synojnë shfuqizimin e mbrojtjeve mjedisore të vendosura nga administrata e Joe Biden dhe përshpejtimin e nxjerrjes së karburanteve fosile. Përveç kësaj, SHBA është tërhequr nga Marrëveshja e Parisit për Klimën.
Në një memorandum të brendshëm të shqyrtuar nga The Guardian, Departamenti i Bujqësisë urdhëroi stafin të identifikojë dhe arkivojë çdo përmbajtje të fokusuar në ndryshimet klimatike, duke përfshirë Qendrën e Burimeve të Ndryshimeve Klimatike të USFS, Gjurmuesin e Veprimit Klimatik dhe Udhërrëfyesin Kombëtar për Reagimin ndaj Ndryshimeve Klimatike.
Ndryshimet e fundit nuk prekin vetëm politikat klimatike, por edhe ato të diversitetit gjinor dhe shëndetit publik. Administrata Trump ka urdhëruar gjithashtu ndalimin e fondeve për studime mbi ideologjinë gjinore, heqjen e përemrave gjinorë nga emailet zyrtare dhe mbylljen e grupeve të burimeve për punonjësit e qeverisë.
i.b./dita
